Shillong, Nailur, 08: Ki nonghikai bad ki khynnah skul jong ka skul Pine Mount, Shillong ha ka sngi Palei ki la dawa ïa ka Principal ka Kong Aïomksiar Diengdoh ba ka dei ban hiar shuki noh mardor.
Ki nonghikai kiba la ngiah hi shoiñ ïa ka jingbym don jingkitkhlieh jong ka Principal ïa la ka kamram ba la bynshet, ki la wohdong ruh ïa ka tnat Pule Puthi jong ka Sorkar Jylla ka bym leh eiei wat hadien ba ki ladep phah da ka jingujor la ar sien kynthih kata ha ka 12 tarik bad ha ka 30 tarik, Nailar.
“Hynrei ha ka jingïakynduh kaba ar sien, ki Ophisar ka tnat Pule Puthi ki la pynpaw ba yn sa thung ïa ka jingtohkit ban peit ïa ka jingeh bad ïa ki jingduna jong ki kh ynnah skul bad hapoh ka skul baroh kawei,” ong ki nonghikai ha ka jingïakren bad ki lad pathai khubor.
“Namarba ngi ladep pynpaw ïa ki jingeh ha ka jingujor ba la phah sha ka tnat Pule Puthi, haduh mynta ngim pat ïohi satia ban don ka jingtohkit bad ngi da kwah ban pynkloi ïa ka jingtohkit,” ki la ong.
Ki la kynnoh ruh ba kam dei satia tang ka jingjaboh jong ki paiñkhana hynrei ka jinghiar arsut jong ka skul baroh kawei naduh ba ka Kong Aïomksiar Diengdoh ka la shimti kum ka Principal jong kane ka skul.
“Mynta ngin da peit ïa ka jinghiar ar sut jong ka skul, ngi ki nonghikai ngi la ingiah ïa ka jinglong jingman jong kane ka skul mynta bad ngi hap ban ieng da ka jingïakhih na ka bynta ka jingbha hi jong ki khynnah,” ki la ong bad bynrap, “ban hikai ngim sngewtynnat shuh bad ngi la puson bha ba ngi hap ban ieng ïa ka hok jong ngi na ka bynta ka jingbha jong ka skul.”
Haba kynnoh ïa ka jingbym ler jong ka Principal, ki nonghikai jong ka skul Pine Mount, ki la ong, “naduh ba (Kong Aïomksiar Diengdoh) la shimti kum ka Principal ym ju don shuh kino kino ki prokram hapoh skul. Ngin da leit ïakynduh ha ophis teng teng ruh ka eh bha. Ki kmie ki kpa ruh ki mad jingeh bha bad ki nonghikai ruh kumjuh. Lada don eiei ban pynsngew ïa ki jingeh ngi hap ban shu ap ïa i bad ïa ki kam kiba ngi hap ban ïakren markhmat bad ka Principal la shu phah pateng ha u Personal Assistant u bym dei hi ruh u nongtrei jong ka skul.”
Ki la ong shuh suh ba ha ki por ba dang don ki Principal kiba rim, ka skul ka ïaid shaphrang, ki nonghikai bad ki khynnah skul ruh kim ju ïakynduh jingeh satia.
“Ka daw baroh ka dei na ka jingbym ler jong ka Principal. Lada ïakren ïa ka jingeh jong ki nonghikai lane jong ki khynnah skul ruh im ju don ha Ophis,” la kynnoh ki nonghikai.
“Mynta ngi ieng skhem halor ka nongrim ban dawa hiar shuki noh ïa ka Principal,” ki la ong.
Ki la kam ruh ba wat ki khynah rit kiba pule ha kane ka skul kim don satia kiba ithuh ïa ka durkhmat jong ka Principal namar ba ym ju don Assembly bad kam ju wan trei satia.
“Ka kham suk ïa ngi ban ïakynduh ïa u Myntri Rangbah ka Jylla ban ïa kaba ïakynduh ïa ka Principal. Da ki sngi ngim ju ïakynduh ïa ka Principal,” ki la ong.
Ha kane ka sngi, ki khynnah skul kiba la deng da ki lama iong ki la ïaid proseshon na khyrdop sha phyllaw jong ka skul ha kaba ma ki ruh ki la dawa ïa ka Principal ba ka dei ban hiar shuki mardor namar ka jingbym lah ban peit ïa ki jingdonkam bad ïa ki jingeh jong ka skul.
