Shillong, Jymmang 26: Ka Congress hynne ka sngi palei, kala dawa ïa u Myntri ka Tnad PWD (Building) Bah Dasakhiat Lamare ban hiar noh na ka shuki Myntri bad ban wengkam shipor ïa u Executive Engineer Bah Ransom Sutnga khnang ban pynthikna ba ka jingtohkit kan long kaba khuid halor ka jingkhyllem u dome jong ka Ïingdorbar Thaw Aiñ ba thymmai ka Jylla.
“Na ka bynta ka jingtohkit kaba khuid, u Engineer ba dei khmih ïa ka Project u dei ban shah sospon bad u Myntri ka Tnad PWD (Building) u dei ban hiar shuki mardor haba shim ïa ka jingkitkhlieh halor ka jingpyntrei torti ïa kiba bun ki project hapoh ka tnad jong u” ong u samla Banphiralang Basaiawmoit, Vice President ka Meghalaya Pradesh Youth Congress (MPYC) haba ïakren bad ki lad pathai khubor.
Ka MPYC kala rai ban nym aipor satia halor kane ka jingdawa haba pynpaw ba ki khlieh ki dei ban hap naduh ka sngi ba khyllem une u dome.
Kane ka jingkren kala mih tang arsngi hadien ba ka High Power Committee (HPC) kala rai ban thung ïa ka kyn hun ban tohkit halor ka jingkhyllem une u dome bad ban audit ïa ka jingshngaiñ jong ka jingtei jong ka Ïingdorbar Thaw Aiñ ba thymmai ha Mawdiangdiang.
U samla Banphira ula kynnoh ba haduh mynta, ka Tnad PWD (Building) kam pat khang satia ïa kane ka jingtei bad ki nongtrei ruh ki dang don ha kane ka jaka.
