Dawa C&RD Block ïa ka Umden, pynsngew ki Khlieh Nongsynshar bad MLA ha u Myntri C&RD

Shillong, Jymmang 15 : Ki Khlieh Nongsynshar na ka Raid Nongtluh, Mathan bad Raid Marmain ryngkat bad ki nongïalam jong ka Nongtluh Mathan Marmain Development Forum hapoh ka jingïalam jong u MLA ka thaiñ Bah Mayralborn Syiem ha ka sngi Palei ki la leit ban kyrpad ïa u Myntri ka tnad C&RD Block, u AT Mondal na ka bynta ban pynïoh noh da ka Block kaba thymmai na bynta ka thaiñ jong ki kaban tip kum ka Umden C&RD Block.
Haba kren bad ki lad pathai khubor hadien ka jingïakynduh bad u Myntri, u Chairman ka Development Forum Bah Arnold Syngkli u la ïathuh ba ka Umling Block ka la hap ban peit palat 200 tylli ki shnong bad kumta lada phiah noh sa kawei ka Block ha Umden ki paidbah ba sah ha khappud ki kham suk shibun namar ba ka la kham jan.
Katba na ka liang u Bah Mayralborn ula ong ba kum u nongmihkhmat naduh ki snem kiba kham mynshwa ryngkat bad ki nongïalam shnong ki la ïa ïakhun na ka bynta ban pynurlong ïa kane ka Block bad kin ïai bteng ruh haduh ban da ïoh. U la ong ruh bashen ryngkat bad ka Forum kin sa leit ban kynduh ïa u Myntri Rangbah ban pynsngew lang ha u ïa kane kajuh ka mat kaba ki la pynsngew ha u Myntri C&RD.
Na ka liang u Myntri pat u la pyntip ba ïa katei ka jingdawa kaba wan na ki nongshong shnong jong ka thain Umden mardor hi un sa ïa kren bad u Myntri Rangbah ka jylla namar ba ka jingthaw thymmai ïa ki Block kadei ka kam kaba ka sorkar ka ju leh man ka por katkum ka jingibit ïa ka jingdonkam ki paidbah.
“Ngan sa ïa kren ïa kane ka kam bad u Myntri Rangbah kumjuh bad ka Planning bad Finance Department bad nangta pat ngin sa tip kumno ka kam kan long,” ong u Myntri.