Nongpoh, Risaw 04: Ki nongïalam jong ka RBYF mynta ka sngi ki la dawa na ka sorkar ban weng noh syndon ïa ka Additional District Medical Health Officer ka Ri-Bhoi District ka Dr AR Marak hadien ba katei ka doctor kam don bor eiei ha katei ka Hospital bad kam lah ban ai jubab eiei ïa ki nongïalam ka seng kiba la leit ban ïakynduh mynta ka sngi hadien ba ka seng kam shym la ioh kynduh ïa ka DMHO namar ba kam don ha katei ka sngi.
U Bah Bipul Thang-khiew President ka RBYF u la ong ba kum ka seng ka pynrem ïa ka jingbym don jingkitkhlieh ka Addl DMHO kaba la kren khyllung khynnah ba kam don jingtip eiei halor ka Nongpoh Civil Hospital namar ka dei tang ka staff jong katei ka Hospital bad kam don bor ban ïakren bad ki nongïalam seng.
Ka jingkren jong ka doktor kaba bat ruh kum ka Addl DMHO ka la pynbitar ïa ki nongïalam ka seng kaba pyni ba kam don jingmut ban kan shong ha katei ka jaka ban shu bam tang ka tulop bad ka seng ka la kyrpad ruh ïa ki 5 ngut ki MLA jong ka Ri-Bhoi ban kren sha ka sorkar ba dei ban weng noh mardor ïa katei ka Doctor na kane ka District.
