Dawa ban pynbha ïa ka surok Rambrai Mawlangsu

Nongstoiñ: Ki paidbah ka thaiñ Rambrai ki dawa na ka sorkar ba ka dei ban pynbha noh ïa ki surok ha ka thaiñ, khamtam ka surok na Rambrai sha Mawlangsu kaba ïaid lyngba ïa ka shnong Phudumbah, Domkohmen bad kiwei kiwei.
Ki nongïalam FKJGP Phudumbah Unit, ki la pynpaw ba kane ka surok la shna naduh u snem 1996, hynrei haduh mynta ka sorkar kam shym la lah satia ban pynbha. Ki la ong ruh katba nang mih ki sngi ka surok ka la nang sniew kat haduh ba ki paitbah nongleit nongwan ki la hap ban kyrsum ktieh manla ka sngi.
Ki la ong ruh ba bunsien ki longkmie kiba ar met kiba la kit na ka bynta ban leit kha khun sha Rambrai PHC, ki la kha noh ha shiteng lynti. Ha kajuh ka por ki la ong ba kaba kham sngewsih ka long ba ki don kiba pang ba shitom kiba la kit ban leit phah sumar, hynrei na ka daw jong ka jingsniew palat ka surok ki khlad noh ha shiteng lynti khlem pat poi ha ki jaka sumar.