Nongstoiñ, Naitung, 02: Ha ka thaiñ Nongtrai kaba hap ha Mawshynrut Civil Sub Division, la lap watla ki surok ki la poi la jan ha man la ki dong bad ki thaiñ, hynrei katba nang mih ki snem ki nang sniew kat haduh ba kim long shuh ban ïaid kali. Kawei na ki surok ha katei ka thaiñ kaba la sniew sha ba palat ka dei ka surok na Mawdiang sha Langdongdai, kaba dei ka surok kaba la shna lyngba ka skhim shi spah sngi. Ha kaba ïadei bad ka jingsniew jong ka surok u Bah Arful Mangsang Secretary ka Synjuk Rangbah Shnong Langdongdai Area (SRSLA) bad u Bah Kardening Rongrin, ki la ïathuh ba katei ka surok ka long kaba donkam haduh katta katta, namar katei ka thaiñ ka dei kaba bun bha ki mar rep kum u sying, u kwai, synsar, ki soh ki pai bad kiwei kiwei.
Ki paidbah na ki 14 tylli ki shnong kiba marjan, ki ju pynlong ïa ka jingmih paidbah ban maramot da kaba trei bor met. Hynrei kim lah satia ban pynbiang kat haduh ba ki kali kin lait suk ban ïaid. Ki la ïathuh ruh ba ha une u snem lei lei namar ka jingjur slap palat, ki longkmie kiba thmu ban leit kha khun lung ha Riangdo CHC ki hap ban ïaid da ka kjat haduh lai bad saw kynta haduh ban da poi ha ki jaka ba lait kali.
Namar kitei ki jngeh, ki paidbah ki hap ban shu shaniah ha ki nongai dawai kynbat haba ki pang ki shitom bad wat ki longkmie kiba armet ruh ki hap ban shaniah ha ki dawai kynbat.
