Tura, Naiwieng 24 : Ka Garoland State Movement Committee (GSMC) ka la dawa na ka sorkar jylla ba kadei ban ai bai luksan kaba shi klur tyngka sha kito ki lanot kiba kyllon ïap ha kuli jong ki pulit Assam ha ka 22tarik ha Mukroh.
Ha ka kyrwoh ba la phah da u nongai ktien jong ka Committee, u Ryan Ch Marak u la pynrem jur ïa ki pulit Assam kiba la wan shaduh u pud jong ka Meghalaya khlem da ïoh jingbit ban siat ïap ïa ki nongshong shnong kiba lui lui.
Da kaba phah ruh ïa ka jingsngewlem sha ki bahaiing ha sem jong kitei ki lanot, utei u nongïalam ka Committee u ong ruh ba ka sorkar India kumjuh ka sorkar Meghalaya kadei ban shimkhia mardor halor katei ka jingjia.
Katkum ka kyrwoh, ka Committee ka la dawa ruh ba ka sorkar kadei ban ai ïa ka bai luksan kaba shi klur marwei sha ki bahaiing hasem jong kitei ki lanot kiba la khlad shiteng por ha kuli jong ki pulit Assam.
“Donkam ruh ban don ka bor pahara kaba khlain bha ha shi lynter ka khappud Meghalaya bad Assam namar lada khlain ki bor pahara kum kine ki jingjia kin ym ïohlad satia,” ula ong.
Utei u nongïalam ka Committee u dawa ruh ba ka sorkar India kadei ban thung da ka kynhun tohkit na ka sorkar pdeng ban pynshitom da kaba tyngeh ïa kito ki pulit ba donkti ha kitei ki kam bymman.
