Mawkyrwat, Risaw, 19: Ka United Hynñiewtrep Movement (UHM) jong ka Mawkyrwat Circle ka la ïoh ban rakhe ïa ka jingdap 3 snem jong ka jingïaid lynti ha ka ban ai jingshakri ïa ka ri bad ka jaidbynriew ha ka jingïalang ba la pynlong ha Mawkyrduk, Tynrong, Mawlangwir, South West Khasi Hills District bad u bah Sounder Strong Cajee, u la long u kum u kongsan.
Haba kren ha ka jingïalang, u bah Sounder Strong Cajee u la ai ka jingïaroh ïa ki nongïalam jong ka United Hynñiewtrep Movement (UHM) kiba la lah ban pynlong ïa kum kane ka jingïalang ban rakhe kyrpang ïa ka jingdap lai snem jong ka bad ka ban pynkynmaw ruh ïa ka jingïaid lynti lyngba shibun ki jingeh bad ym tang kata watla hapdeng kita ki jingeh kiba bun bun kum ka seng ka la lah ruh ban khring ïa ki samla ban long ki dkhot jong ka naduh ki samla shynrang bad kynthei ruh. U la ong ruh ba lyngba ka jingïoh shibun ki dkhot, kan long kawei na ki lad ban trei na ka bynta ki kam ba sah teng jong ka ri bad ka jaidbynriew namar katba ki sengbhalang ki dang khih na ka liang ka sorkar ruh i kumba ka dang ïai pyneh. Namarkata, kum ki samla ki dei ban long kiba la khreh ban ïeng ïaleh ha kaba kawei ka kjat sha u paidbah bad kawei ka kjat sha phatok.
Haba kren ai mynsiem na ka bynta ki samla jong ka seng, u ba Sounder u la ong ba kum ki nongïalam kim dei pat ban tieng, namar haba ki leh ïa ki kam ba bha u paidbah ruh u kyrshan hynrei lada ki leh pat ki kam sniew (tuh, pynïap bad leh ki kam dakaid) ymdon wat uei ruh u ban ai jingkyrshan.
U bah Sounder ula pynkynmaw ruh ba ki nongmihkhmat ha ki snem ba la leit ki dei kita ki nongïalam bad ki nongthaw aiñ ba shisha hynrei mynta pat ki la dei ki nongthaw pisa namar haba phai u snem 1972 haduh 1983 ei ei ki nongmihkhmat kiba dei kat ki nongmihkhmat shisha ha kaba ki la thaw ïa kawei ka aiñ kaba dei ka nongïada ïa ka khyndew ka shyiap bad kata ka dei ka “Land Transfer Act” khnang ba kiwei pat ki jaidbynriew kim lah shuh ban wan thied jaka katba mon.
Ha kajuh ka por u la kren ruh shaphang ha ka wad kam wad jam, da kaba u pynkynmaw ïa ki samla ba ha kane kajuk ba mynta la eh than ban wad ki kam sorkar hynrei ka la dei ban por ban sdang ban kyntiew noh da kaba seng ki kam la jong ban long trai da lade ym shuh ban shuh shaniah ha kiwei namar lada ki pyrshang bad long kiba ïai neh ymdon ba lah ban tuh noh ïa kata ka kam ba ki ki trei hynrei kin lah ban nang kiew na kawei ka sngi sha kawei pat.
Ha kane ka sngi la ïoh ruh ka jingkren ai mynsiem bad pashad ruh ïa ki katto katne ki mat trei kam jong ka seng na u bah Charlie J. Rani, President ka United Hynñiewtrep Movement (UHM), Central Body bad uba la shim ruh ka bynta ban pyntiam smai ïa ki nongïalam jong ka United Hynñiewtrep Movement (UHM), South West Khasi Hills District.
Ha kajuh hi ka sngi la ïoh ruh ban pynskhem ïa ki nongkitkam kiba thymmai jong ki Unit kata jong ka United Hynñiewtrep Movement (UHM) Ranikor & Shnongkalong Unit, bad jong ka Mawlangwir Unit.
Kum ka dak jong ka jingdap lai snem jong ka United Hynñiewtrep Movement (UHM) Mawkyrwat Circle, u bah Sounder Strong Cajee kum u kongsan u la ïoh ruh ban ot ïa u cake ryngkat ka jingïadonlang ki nongïalam bad ki dkhot jong ka UHM.
Ki nongkitkam jong ka UHM, South West Khasi Hills District ki long President u George B. Iawphniaw, Vice President u Jolin Lyngdoh, General Secretary u Panbor Marweiñ, Organising Secretary u Kynsaibor Lyngkhoi, Publicity Secretary u Joyfullness Wanniang, Environment Secretary u Phoming, Education Secretary u Perstarland Lyngdoh, Socio & Cultural Secretary u Sundaybornstar Syiemiong ryngkat bad baroh ki nongkikam jong ki Unit hapoh jong ka distrik kin long ki dkhot.
Nangta, shuh shuh ki nongkitkam jong UHM Mawlangwir Unit ki long President u Destarland Lyngdoh, Vice President u Paul Lyngdoh, General Secretary u Tyngshaiñ Myrthong, Assistant Secretary u Isfriday Lyngdoh, Organising Secretary u Kitbok Wanniang, Publicity Secretary u Hesmandar Lyngdoh, Environment Secretary u John Kilbest K. Sohphoh, Sports Secretary u Phristarland Lyngdoh, Relief Secretary u Batshaibor Lyngdoh, Socio & Cultural Secretary u Shngaiñbor Lyngdoh, Education Secretary u Tyngshaiñ Nongsiej, Adviser u Jolin Lyngdoh, u Anthony Wanniang, u R. Syiemlieh, u A. Iawphniaw bad u Panbor Marweiñ ryngkat bad ki 16 ngut ki dkhot.
Ki nongkitkam jong ka UHM Ranikor & Shnongkalong Unit ki long President u Sundaybornstar Syiemiong, Vice President u Embires Nongphlang, General Secretary u Kevin Thongni, Assistant Secretary ka Badahunshisha Syiemiong, Finance Secretary u Refoundar Syiemlieh, Sports Secretary u Teiborlang Syiemiong, Education Secretary u Pynshailang Shangdiar, Environment Secretary u Hodingroy Syrman bad Health Secretary u Albidonal Turnia.
La pynïaid ïa ka jingïalang da u bah Jolin Lyngdoh, President ka UHM Mawkyrwat Circle, bud sa ka jingdwai na u bah George B. Iawphniaw, ka jingkren ai khublei la ïoh na u General Secretary ka United Hynñiewtrep Movement (UHM), Mawkyrwat Circle, u bah Panborpura Marweiñ.
