Shillong, Ïaiong 17 : Da ki spah ngut ki thei sotti bad ki rangkynsai na kylleng ki shnong bad ki dong ki la wan ban shim bynta ha ka Shad Lyngdoh jong ka Raid Wahkhen kaba long ha kane ka sngi U Blei ha madan shad kaba don ha Wahkhen ha ka rukom kaba shongkun bha.
Katkum ka jingïathuh da u Sordar ka Raid, Bah Skhembor Khongjirem, katei ka jinglehniam ka la sdang naduh ka 14tarik, ban ai ïa ka nguh ka dem ïa u‘lei raid ‘lei shnong uba dei u Lyngdoh kaba u longshwa manshwa u hikai ban pyndep ïa ka niam ka rukom, ka suit ka shor, ka duwai ka phirat ban ai ka khiah ka nang, ban ai ka shait ka khlaiñ bad ruh ïa ka kamai kajih kaba bit ka biang.
“Ha kine ki arsnem ngi khlem lah ban pynlong ïa ka shad namar ka khlam COVID tangba ngi pyndep pat ïa ka nguh ka dem ka suit ka shor bad ka lehniam jongngi,” la bynrap shuh shuh u Sordar da kaba ai khublei ïa ki nongshad kiba wan na kylleng ki shnong jong ka rilum Khasi-Jaiñtia.
La ïathuh ruh ba ha katei ka Shad Lyngdoh ki kynthei kiba lah ban shad ki dei tang kiba dang sotti katba ïaki shynrang pat ym don jingkhang. “Ngi don ruh ka skul hangne kaba hikai ym tang ka shad hynrei wat ha ka tem ka put ruh.”
Haba bynrap lang, u Syiem ka Hima Khyrim, ‘Paiem Balajied Sing Syiem haba ïathuh bniah halor katei ka Shad Lyngdoh, u ong ba ïa katei ka shad ki ju pynlong hadien ba la dep ka lehniam. “Ki don ruh ki khynnah rit watla kim pat biang ki riam ki beit ruh hynrei ki mih sha madan ban shim bynta lang ha katei ka shad ban pynkmen ïalade bad ïa ka ïing ka sem namar ka long ka burom ïangi ruh ba ka don ka jingsngew shngaiñ ba naduh dang rit ki la shim bynta lang ka mut kaei kaei kaba buh u barim, ka tem ka put, ka shad ka kmen ka sah ka neh,” la ong u Paiem.
Ha katei ka sngi la donlang ruh naduh ka SDO (Civil) jong ka Sohra Civil Sub-Division, Kong E Warjri, nangta ki Bakhraw jongka Hima Khyrim, ki khlieh nongsynshar, ki nongïalam shnong bad ki kmie ki kpa kiba wan ban synran ïa ki khun ki kti bad khamtam eh ki nongshong shnong ka thaiñ kiba la mih ryntih ban wan sakhi ïa katei ka shad Lyngdoh kaba dei kawei na ki jingshad kaba pawnam bha ha katei ka thaiñ.
