Dap 50 snem ka Nongsynrieh Deficit UP School pynkup burom ïa ki nonghikai bad nongseng skul

Mawkyrwat, Risaw, 29: Ka Nongsynrieh Deficit Upper Primary School, South West Khasi Hill’s District ha ka jingphuh jingphieng ka la ïoh ban rakhe lehkmen ïa ka jingdap 50 snem ne ka Golden Jubilee Celebration kata naduh ba la sdang ban seng ïa ka ha u snem 1974.
Lah ruh ban kdew ba ki ‘riew ïohi jngai kiba don ka jingkitkhlieh ïa ka imlang sahlang na ka bynta ban kyntiew ïa ki jingnang jingstad kiba la seng nyngkong ïa kane ka skul ki long u babu Phrinly Wanniang, u (L) Thwellington Mawlieh, u (L) Babu Aiborsing Lyngdoh. Kane ka skul ka la sei ïa shibun ki khynnah kiba stad kiba long ruh ki ophisar ne nongtrei sorkar kata naduh ba la seng ïa ka haduh kine ki sngi ba mynta. Ha kane ka sngi la ïoh ban ïalehkmen lang naduh ki paidbah jong ka shnong ki nonghikai ki khynnah skul kiba rim bad kiba mynta kiwei de kiba la shah khot sngewbha.
Ha kane ka sngi la ïoh ruh ban pynkup burom ïa ki nongseng ïa ka skul kiba kynthup ruh ïa ki nonghikai ba la shongthait bad kiba mynta bad ruh ïa ki dkhot jong ka Managing Committee, ïa ki khynnah ba wan pule nyngkong bad ruh ïa ki khynnah skul kiba la pyndep ïa ki degree bapher bapher.
U kongsan ha kane ka jingrakhe u dei u bah Carnes Sohshang, MDC jong ka Mawkyrwat Constituency ha ryngkat da ka jingïadonlang u Commander Shangpliang, u bah S.S. Lyngkhoi Aditional Sub Divisionla School Education Office, South West Khasi Hillls District, bad kiwei de ki ‘riew rangbah kiba la shah khot sngewbha bad la pynïaid ïa ka jingïalang da u bah R. Nonglang Chairman jong ka School Managing Committee bad la ïoh ruh ka jingpule ïa ka History jong ka skul da u Babu M. Mawlieh.
U Bah Carnes Sohshang haba kren ha ka jingrakhe ïa kane ka sngi kyrpang u la pynpaw ka jingsngewnguh ïa ki nongseng ïa kane ka shlem ai jinghikai kiba la ïohi jngai na ka bynta ban kyntiew ïa ka puke puthi ha kane ka shnong Nongsynrieh. Ha kajuh ka por u la ai mynsiem ïa ki khynnah skul da ki kyntien ba shongsbai, da kaba ong ba kum ki khynnah skul ha ryngkat ki kmie ki kpa ki dei ban don ka thong kaba hakhmat tam kumno ban ïoh long ki riew khraw ha ka pyrthei bad ruh ula ai ka jingkitbok kitrwiang ruh ïa baroh kiba la ïa don bynta ha kane ka skul ba kin dang ïai sei shuh shuh ïa ki khynnah skul ki ban long ki khlur ba phyrnai na kane ka thaiñ bad ban lah ruh ban pyntyllung ïa ki kam ha ka jingnang jingstad.
Ïa kane ka jingrakhe jong ka jingdap 50 snem jong ka skul la pynshit pynshngaiñ da ki jingrwai jingshad na ki khynnah skul.