Jowai, Risaw 30: Ka Mukhla Raij Upper Primary School, West Jaiñtia Hills District mynta ka sngi 30 tarik u Risaw, 2024 kala pynhap pyrda ïaka jingrakhe Jubilee Ksiar ba 50 snem ka jingshakri jingnang jingstad ïaki khynnah skul ka thaiñ haka jingïalang ba la pynlong ha Madan Thad.
Ïa kane ka skul la seng naduh u snem 1974 jong u bnai April ïa kaba la ai kyrteng nyngkong ka ‘Mukhla Middle School’ da ka jingthmu ban ai jingnang jingstad ïa ki khynnah hapoh ka thaiñ Mukhla Dorbar Pyllun kaba kynthup ïa ki san tylli ki shnong bad ha kaba sdang ka skul ki don tang 15 ngut ki khynnah skul bad mynta kila kynjoh duna ïa ka 700 ngut.
Ha kane ka sngi la ïadonlang naduh u kongsan uba dei ruh u Symbud Myntri rangbah ka sorkar jylla u ma Sniawbhalang Dhar, u myntri ka tnad pule pule u Rakkam A. Sangma, u MLA ka thaiñ ma Wailadmiki Shylla, u CEM ka JHADC ma Thombor Shiwat, ki MDC, ki ophisar sorkar, ki nongïalam shnong, ki nonghikai, ki khynnah skul lem bad ki nongshong shnong.
La pynphuh pynphieng shuh shuh ïa kane ka jingdap 50 snem ka skul da ki jingrwai, ki jingshad na ki khynnah skul bad kumjuh na ka shnong kiba la ai ïa ki jingshad tynrai, ha ka juh ka por la pynkup burom ruh ïa ki member ki nonghikai bala seng ïa kane ka skul bad ïa ki 28 ngut ki khynnah skul ba rim kiba la bat mynta ha ki kyrdan treikam bapher bapher.
Ha kane ka sngi la pyllait paidbah kymjuh ïa ka Souvenir jong ka skul bad la aiti ruh ïa ka Memorandum ban pynpoi sha u Myntri Rangbah halor ki jingdawa ba donkam ban pynïaid shakhmat ïa ka skul naduh ka jingpynkiew kyrdan ïa ka skul, ka building skul, ki rukom ai jinghikai, ka tulop ki nonghikai bad ka jingpynrung skul ïa ki khynnah skul.
U ma Wailadmiki Shylla kum u member jong ka SMC ka skul ula ong kane ka jinglehkmen ka long kum ka dak ban lehburom bad ka jingsngewnguh ïa ki nongseng ïa kane ka skul.
U Rakkam A Sangma u ong shibun ki khlur kiba kane ka skul kala lah ban pynmih, kumta u khot lang ïa baroh ki nonghikai hapoh ka jylla ba ai ka jinghikai kaba bha tam sha ki khynnah skul katkum ka juk ba mynta namar da ki hajar klur ka sorkar kala pynlut na ka bynta ka pule puthi ban pynkylla dur ïa ka jingnang jingstad kaba ïahap kyrdan bad kiwei pat ki jylla hapoh ka Ri.
Kumta u kyntu ïa ki khynnah skul ban long kiba minot bad kiba don ka thong ba phyrnai ha ka jingim. Ula ai mynsiem ïa kane ka skul ban kan dang kiew shaphrang, da kaba ong kane ka long tang ka jingsdang bad ula kular ban buddien ïa ka memorandum ba la aiti da ka skul mynta ka sngi
Katba na la liang u kongsan ma Sngawbhalang Dhar ula plie ïa u mawnongrim jong ka skul bad la ot ruh ïa u cake jong ka jingdap 50 snem ka skul. Ha ka jingkren ula ai ka jingïaroh ïa ki nongseng ïa kane ka skul kiba la ïohi jngai ïa lashai la shisngi. Ula pynpaw ka jingsngewkmen halor ka jingdon ki riew synñiang na kane ka shnong kiba la kyrshah pura ïa kane ka skul haduh mynta.
Ula pynsngew ba ka shnong Mukhla kala bat naduh mynshwa ïa ka burom ka akor wat haduh ka rukom pynïaid ïaka shnong ka thaw. Kum u MLA uba kane ka thaiñ kala ai jingkyrshan nyngkong ïa u, ula kular katba lah ban ïarap ïa ki jingdonkam jong ka skul, kumjuh ruh ban wanrah ïa kawei ka madan phubol kaba long katkum ka juh ba mynta hapoh ka Mukhla, ula pynkut ïa ka jingkren da kaba ong ba ka jingnang jingstad ka long kaba donkam eh ha ka jingim.
