Shillong, Jylliew 17: Mynta ka sngi 35 snem mynshuwa, kata ha ka 17 tarik u Jylliew 1987, ha ka por ba dang jur bha ka jingïakhih beh mynder, uwei u Samla u la kyllon ïap ha ki ktang suloi jong ki Pulit CRP ha Motphran bad une udei u Samla Biswal Paul Makri, u Volunteer jong ka Seng KSU.
Kum ka dak ka jingkynmaw burom ïa ka mynsiem shlur bad lenlade, une u Samla, ka KSU Western Border Area ha ryngkat ki dkhot ka KSU Umrit Unit kiba hap hapoh ka jylli treikam ka KSU North Khasi Hills District Unit ki la leit ban ia kynduh bad pyntngen ïa ki bahaiing bahasem u (L) Paul B Makri ha shnong Umrit mynta ka sngi.
Ka kyrwoh na ka Seng ka ong, ba da kaba kyrtiang biang sha ka mynnor, 35 snem mynshwa ha u snem 1987 ha ka por ba dang khluit bha ka jingiakhih Anti-Foreigners’ Movement hapoh jylla, ka la don ka jingsynreit kuli pathar jong ki pulit CRPF ia ki samla Khasi bad ia ki iing Khasi ha u bnai Jylliew khamtam ha ki thaiñ Motphran, Mission Compound, Mawkhar, Jaiaw, Umsohsun, Wahingdoh bad Riatsamthiah. Kane ka jingiakynad ka la khih phaloh bha ha ka 15, 16 bad 17 tarik u Jylliew ha kaba da ki phew ngut ki dkhot ka KSU ki la shah siat bad mynsaw jur. U President ka KSU ha kato ka por u (L) Bah Bull N Lyngdoh ruh u la shah tied dusmon ha ki pulit bad shah set along.
Ha ka 17 tarik u Jylliew 1987, u Samla Paul Biswal Makri uba dei u KSU volunteer u la shah siat na khlieh ha ki thaiñ Motphran bad u la kyllon iap ha shen. Ryngkat bad u sa uwei pat u samla u la iap ha kaba u kuli sorkar u la ksam lyngba ka iing jong u bad dung prak ia u. Kane ka jingiap u Paul Makri ka la pynkhih win ia ka Jaidbynriew bad ka jingiakhih kaba jur bha ka la bteng haduh 1 snem kynthih.
U Samla Biswal ha kane ka por ba u shah siat iap u dang 19 snem ka rta bad u dang don hapdeng ki jingpule skul ha Government Boys Secondary School bad Karate (white belt) ha YMCA. La kha ia u ha ka shnong Umrit ha Ri Bhoi bad ha Shillong u sah wai ha Jaiaw.
Ki paidbah kiba ïathuh khana ki ong ba la don ba kyntu ïa u samla Paul ba un phet noh na ka jaka ïakhih haduh ar sien namar ba ki pulit CRPF ki la synreit kuli pathar ïa ki paidbah, hynrei u Paul Makri u la pyneh triang bad ïai bteng ban ïa don bynta bad ki para dkhot ka KSU kiba dang ia khih ha Motphran tad haduh un da shah siat bad shah kit ka met sha Civil Hospital. La tep donburom ia u Paul Makri ha lum jingtep Katholik ha Mawprem.
Ha kane ka kyrwoh, ka KSU ka pynsngew ruh sha ki poiei bad ka sorkar ba ki bun ki dkhot ka seng ki la long martyr ha ka jingïaleh bad kiba mynta ruh ki dang pahuh kiba kloi ban aiti ia lade na ka bynta ka dawbah ka Jaidbynriew tad haduh ba ka Ri Khasi kan khuid phar na ki mynder buhai shnong.
