Dap 33 snem ka jingïoh district ka South Garo Hills, pynkynmaw u CM ïa ki kam pynroi ka Sorkar

Shillong, Jylliew, 18: U Myntri Rangbah ka Jylla u Conrad K Sangma ha ka sngi Balang u la ïashim bynta ha ka 33rd Foundation Day jong ka South Garo Hills District.
Ha kane ka jingïalang la ïashim bynta lang da ki Myntri Sorkar ba kynthup ïa u A T Mondal, u Bah Shakliar Warjri, u Marcuise N. Marak bad u Rakkam A Sangma, ryngkat ki MLA u Sanjay Sangma, u Kartus Marak bad u Sengchim Sangma, u CEM ka GHADC u Albinus Marak.
Haba kren kum u Kongsan u Myntri Rangbah ka jylla u la kren halor ka jingangnud jong ka Sorkar ban kyntiew ïa ka South Garo Hills bad ïathuh ba naduh u snem 2018, la pyntreikam ïa ki projek bapher bapher kiba kot T. 1400 klur ha kane ka thaiñ, bad sa T. 400 klur yn sa mang hapoh ki skhim bapher bapher ha kine ki 2-3 snem ban sa wan.
“Ha u snem 2018 mynba nga leit sha Baghmara, nga la kular ba ngan leh katba lah ban kyntiew ïa ka South Garo Hills.Ngi la buh kyrteng ïa ki jingthmu bapher bapher na ka bynta ka thaiñ bad ha kine ki hynriew snem ba ladep, ngi la pyntreikam ïa ki projek bapher bapher kiba shongdor T. 1400,” u la ong.
Da kaba pynpaw ba ka Sorkar ka la ai jingmut bha na ka bynta ka roi ka par jong ka thaiñ, u la ong, “ka South Garo Hills ka nang kylla dur suki suki, da kaba thaw lad na ka bynta ki briew trai ri jong ngi.”
U la pyntip ruh ba katba ka Jylla ka dang pynkhreh ïa ka jingrakhe ïa ka jingdap 60 ka jingïoh ïa ka jylla, ka thong ka long ban pynthikna ïa ka roi ka par kaba kynthup lang ïa baroh.
“Ka la dei ka por ba baroh ki district kin pynleit jingmut ha ki sienjam bapher bapher ban pynthikna ba ynda ka Meghalaya kan rakhe ïa ka jingdap 60 snem jong ka jingïoh jylla bapura, kan don ka daw ïa uwei pa uwei na ngi ban rakhe bad sngew sarong kum u nongshong shnong Meghalaya”, u la bynrap.
“Ka jingthmu ba kongsan jong ka Baghmara ka long ban kyntiew ïa ki jingïalehkai sports, ki jingtei, ne ka khaii pateng ngi hap ban pyrkhat bad pynurlong ïa ka,”u la ban jur.
“Lada ngi hap ban pynkylla dur ïa ka Meghalaya, tang ka Sorkar marwei kam lah ban leh hynrei uwei pa uwei u nongshong shnong u hap ban ïatreilang da ka jingpyrshang ban ïatreilang”, la ban jur u Sangma
Haba kren shaphang ka jingroi ki ka kam jngohkai pyrthei, u la ong, “ka sorkar ka don ban kyrshan ïa ka kam jngohkai pyrthei, nga sngewkmen ban tip ba ki briew ki mih ban sdang ïa ki kam seng kam seng jam bad ki Homestay ha Baghmara. Kane ka dei ka jingsdang jong ka jingkylla ha ka ïoh ka kot ka ban pynthikna ïa ka lawei jong ki nongshong shnong jong ngi”, u la ong.
U Sangma ula ban jur ruh halor ka jingdonkam jong ka Carbon Credits bad ka jinglah ban ïoh jingmyntoi ïa ka South Garo Hills na kane ka jingthmu.
“U la kyrpad ïa ki nongshong shnong ba kin ïada shuh shuh ïa ki khlaw bad ki wah jong ki, da kaba pynpaw ïa ka jingriewspah jong ki jingthaw ba im jong kane ka thaiñ bad ka jinglah jong ka ban khring ïa ki kompeni kiba wad ban siew kylliang ïa ka jingmih jong ka Carbon.
U Myntri Rangbah u la plie paidbah ruh ïa ka Meghalaya Economic Inclusive Program (M-EIP) bad ïa ka CM Fellowship, bad aiti ïa ki Cheque sha ki nongïoh jingmyntoi hapoh ka MegCARE.
U la buh ruh ïa u mawnongrim ban tei ïa ka jaka ïalehkai Synthetic Athletic Track bad ka iing skul ba thymmai jong ka Captain Williamson Government Higher Secondary School.
Ha kane ka jingïalang aiti ïa ki syrnot sha ki skul bad ki khynnah skul kiba leh bha ha ka eksamin HSSLC bad SSLC ba dang shen.
“U Myntri ka tnat Pule Puthi u Rakkam A Sangma bad u Myntri ka tnad ïalehkai u Shakliar Warjri ruh ki la ai jingkren ha kane ka sngi, da kaba pynpaw ïa ka jingshimkhia jong u Myntri Rangbah ka Jylla ban kyntiew ïa ka ïoh ka kot jong ka jylla baroh kawei.
Ha kane ka jingleit jngoh jong u Myntri Rangbah sha Baghmara, u la plie ruh ïa ka Prime Hub ba dang shna thymmai bad u la leit jngoh ruh ïa ka Baghmara Police Station, kaba la pynthymmai hapoh ka Police Infrastructure Development Fund.