Nongpoh, Naitung 27 : Ka Confederation of Ri-Bhoi People (CoRP) kawei naki seng bala kham rim ha Ri-Bhoi hynin ka sngi kala lum da ka jingïalang jong ka Central Executive Committee ban pynhap noh ïala lama barim jong ka seng kaba dei ka rong lieh, bad ban pynher da ka lama ba thymmai kaba dei ka rong jyrngam bad rong lieh haka jingïaid lynti ba 25 snem jong ka seng, ryngkat ka thong ban dang pynskhem bad pynkhlaiñ shuh shuh ïaka treikam jong ki Circle bad ki Zone bapher bapher jong ka seng haka them Ri-Bhoi.
Ïa katei ka jingïalang la pynlong ha ïing Dorbar Nongpoh, bad lawan ban pynshngaiñ lang da u Bah S.S.R Kharbamon Principal ka Ri-Bhoi College kum kongsan, ha ka jingdon ryngkat lang u Bah Doris sulein u ba dei u Founder President jong ka Seng CoRP, u Bah Bandari Ryntathiang President ka CoRP, u Markus Makri General Secretary, u Gershome Hat Vice President bad ki nongïalam naki zone bad ki circle bapher bapher.
U Bah Bandari Ryntathiang President ka CoRP haba kren sha ki lad pathai khubor u la ong ba ka jingthmu jong kane ka jingialang ka long ban ïatai ïathir halor ki mat ban nang pynkhlaiñ shuh shuh ïaka jingtreikam jong ka seng bad ban nang pynkhlaiñ bad pynsuh thied shuh shuh sha ki shnong bapher bapher khamtam ha ki thaiñ nyngkyndong.
U la pynpaw ruh ka jing pynkylla ïaka rong jong ka Lama sha ka rong Jyrngam bad rong lieh ka long ban pynpaw sha ka pyrthei ba ka rong Jyrngam ka thew ïaka jinglong Jyrngam jong ka thaiñ Ri-Bhoi bad ka ba lieh ka thew ba kum ki nongïalam jong ka seng ki dei ban long kiba khuid kiba suba haba ki ai ka jingshakri sha ki paidbah.
Lyngba katei ka jingïalang la lah ruh ban ïathir ïatai halor shibun ki mat kumno ban nang kyntiew bad ban dang pynkhlaiñ ïaka jingtreikam jong ka seng naka bynta ban dang ai shuh shuh ka jingshakri kaba paka sha ki paidbah ka them Ri-Bhoi halor ki ishu bapher bapher.
Naka liang u Bah SSR Bamon Principal ka Ri-Bhoi College haba kren ha katei ka sngi u la ai mynsiem ïaki dkhot jong ka seng da kaba pynkynmaw ïaki nongïalam barim kum u Bah Bull Lyngdoh President ba rim ka KSU u ba la leh shibun ki kam ban noh synñiang sha ka imlang ka sahlang, da kaba kyntu ruh ïaki nongïalam jong ki Zone bad ki Circle ba kim dei ban shong kli kti hynrei ban trei ban khih ban ksar naka bynta ka imlang ka sahlang namar lada khlaiñ ki zone bad ki circle, ka sengkmie ruh kan khlaiñ, u la bynrap.
