Dang wad ki pulit ïa ki lad jingïarap na ki paidbah ban ithuh ïa ka longkmie ba ïap ha Ampati

Shillong, K’ Lyngkot 31: Ki pulit ka Ampati ki dang wad ïa ki lad jingïarap jong ki paidbah ban ïoh ka jingithuh bad ban tip ruh ïa ka kyrteng bad ka jaka shong jaka sah jong kawei ka longkmie, kaba la lap ha ka step jong ka 27 tarik mynta u bnai ha Ampati.
Lah ban pynkynmaw ba ki pulit ki la lap ïa ka met ïap jong katei ka longkmie na kawei ka jaka ap kali kaba la rim ha Joyfar Junction kaba dang hab ha Ampati Police Station. Na ka liang ki pulit ki la dep ruh ban pynlong ka jingtohkit ha kane hi ka jaka ba la lap ïa katei ka metïap bad ïa ka met pat kham hadien la phah pynkit noh sha ka jaka buh metïap na ka bynta ka post-mortem.
Katkum ka jingshem jong ki pulit ha kaba nyngkong bad lyngba ka jingai sakhi ki nongshong shnong, la shem ba imat katei ka briew ka dei ka bym biang ka bor pyrkhat pyrdaiñ bad kaba don ruh ha ka met ka bym koit bym khiah. La iathuh ruh ba la ïohi ïa ka ha kane ka thaiñ ha kine ki 3 ne 4 bnai bad la suba ba ka lah ban dei na ka jaitbynriew ka niam Muslim, naba la ju ïohsngew ba ka ju pynmih ïa ki kyntien “Allah.”
Ka met jong kane ka longkmie ba la khlad, ka dei kaba raikhoh bad kaba la malu mala kumba 60 snem ka rta bad kaba jrong kumba 5 phut, ka don ruh ïa ka dur ka dar kaba met ïong bad ïa ka met jong ka la buh ha jaka buh metïap na ka bynta ki bahaïing ba kin wan kam bad ithuh ïa ka.