Shillong, Iaiong 5 : Ka tnad pulit ka dang tohkit bniah halor ka Email ba la phah da ka seng Lawei ba Phyrnai kaba la byrngem ban pynbthei bom ha kiba bun jaka khamtam ha ki jaka pule kum ka dak ban pynpaw ka jingpyrshah ïa ka jingkiew ka kyrduh kam kyrduh jam ki samla.
Haba kren ha ki lad pathai khubor u Myntri ka tnad kam pohïing u ma Lahkmen Rymbui u la ong “ Ki pulit ki dang ïai bud dien halor kane ka kam bad kane ka email bad shen ngin sa tip naei ka tynrai jong kane ka shithi”.
Ha ka email ba la phah da kane ka seng sha u Myntri Rangbah u Conrad K Sangma ka la kam ba ka dei ka seng lehnoh ba la seng nongrim da ki 37 ngut ki riew don kyrdan kiba ym ïoh kam ïoh jam. La byrngem ba kan sdang ban leh da ki kam pynbthei bom naduh ka 1 tarik Jymmang 2022.
