Shillong, Naiwieng 10 : Ki pulit ka Jylla ki dang bteng ïa ka jingtohkit bad thwet ban lap ïa ki runar kiba donkti halor ka jingïap jong u heprit ba dang 7 snem ba tip kyrteng kum u Kyrshanbor Kharmudai.
“Na ka liang ka Special Investigation Team (SIT) ka don mynta ha ka kam ban tohkti bad thwet ban lap ïa ki briew kiba donkti ha ka jingïap jong une u khynnah,” ong u Superintendent of Police ka East Khasi Hills, Bah Vivek Syiem haba kren bad ki lad pathai khubor.
U SP u ong ruh ba kane ka jingjia ka long kaba kyllain bha ha kaba ki la dep ban tohkit bun bha ki briew.
“Ngi la ïoh ïa ka report post mortem, ngi dang ap mynta ïa ka report na forensic ban ïoh ksai shuh shuh. Ïa mynta hi ngam pat lah ban ong ei ei than namar ki dang don bun bha kiei kiei……” u la bynrap shuh shuh.
Katkum ka jingïathuh jong u, ka report post mortem ka kdew ba ka jingïap jong utei u khynnah ka dei na ka jingbym ïoh ring mynsiem. Ïa ka met jong une u heprit la lap na kawei ka khlaw ha Mawpat ha ka 09tarik u Risaw shisngi hadien ba u la jah na iing sah na Nongrah.
