Dang thwet jur ki pulit ïa ki briew kiba ïadonkti bad ïasylla ban pynbthei bom ha ka Dhar Kompani

Shillong, K’lyngkot 06 : Ki Pulit ka Jylla kila pynjur ïa ka jingthwet ban ïoh kem ïa ki briew kiba ïadonkti bad nongsylla ba hakhmat eh (mastermind) ha lyndet ka jingpynbthei bom IED ha phyllaw ka Dhar Construction Company ha ka shnong Shymplong, East Jaintia Hills.
“ïa mynta ngi dang tohkit ïa kane ka case. Ngi la pyrshang ban lapdien ïa arngut ki briew kiba la phetrieh” ong u Superintendent of Police (SP) ka EJH Vikash Kumar ha ka sngi Ba-ar.
Ka seng Hynniewtrep National Liberation Council (HNLC) kala kam ïa ka jingdonkti halor kane ka jingpynbthei bad ong ba kala pynlong sohpdung ia ka nongkynti kaba long trai da u Symbud Myntri Rangbah Bah Sniawbhalang Dhar namar ka jingkynnoh ba u khlem siew ïa ka pisa ba dawa ka seng.
Hynrei u SP ula pyntip ba ka jingthwet kaba jur kala ïaid pyrshah ïa u nongsylla ba hakhmat eh halor kane ka jingpynbthei bom IED.
Une u nongsylla ba hakhmat eh u dei uba la ithuh kum u Smiki Tongper ba na Shymplong bad u Issei Sungoh, u dkhot ka HNLC na Khiehriat, baroh arngut kiba la shah thwet ha kiwei kiwei ki case ruh.
Katba u Smiki Tongper u dei uba shah thwet namar ka case kaba la register hapoh ka POCSO Act, u Issei Sungoh u dei uba la shah thwet halor ka jingpynbthei bom IED hapoh ka Police Reserve ha Khliehriat nalor kiwei kiwei ki kam bymman.
Ha kane ka jingpynbthei bom ha Dhar Company kaba jia ha ka 15 tarik Nohprah 2025, ki Pulit kila kem ïa arngut ki briew kiba suba donkti bad kine ki dei u Richard Suchen ba 31 snem bad u Pynshaitbor Syih ba 45 snem.