Nongpoh, Nailar 17: Kiba haïing hasem jong u Bah Ebi Nongshli 47 snem ka rta na ka Shnong Umtasor ki dang sah mynta hapdeng ka umdum bad ha ka jinglyngngoh, ha kaba haduh mynta ïa ka met jong une u rangbah ba jah ha wah Umran ha ki bynta jong ka Iewsier ym pat lap satia.
Kum ban pynkynmaw, kane ka jingjia ka la jia ha ka 27 tarik u Naitung 2025 ha ka janmiet jong ka sngi U Blei ba u Bah Ebi Nongshli u dang shongkai bad ki paralok ha ka Jingkieng kaba don ha Iewsier, hynrei ym lah ban tip kynsan kynsan u la hap najrong Jingkieng ha kaba u la shah rong noh ha ka umbah ha katei ka wah Umran ba hap ha ka thaiñ Iewsier ha Ri Bhoi District.
Ha katei hi ka miet la pynlong ruh ïa ka jingïawad ïa utei u rangbah ba la shah rong ha ka um bad kim shym la lap dien satia ïa utei u rangbah.
Halor kane ka jingshah rong une u rangbah ha ka um, la pynlong ruh ïa ka jingïawad naduh kiba haïing hasem bad wat ki paidbah nongshong shnong, hynrei haduh mynta kim shym la lap satia ïa ka met jong u. Na ka liang ki bor pulit ruh ki la ïa wad lang bad ki paidbah ha kaba haduh mynta ba la dap 22 sngi naduh ka sngi ba u la jah ym shym la lap ïa ka met jong u.
Haba ïoh ban ïa kren bad u Rangbah Shnong ka Umtasor, u Bah R. Mukhim, u la ong ba kane ka jingbym pat lap ïa ka met jong utei u rangbah ka la pynsah umdum ym tang ïa kiba haïing hasem bad ka la pynsah umduh wat ïa ka bor shnong ha kaba hapdeng ka jingïawad shitom haduh mynta ym pat lap satia ïa ka met jong u.
U la ong ruh wat ka Dorbar Shnong ka la khot la wer ïa baroh ki paidbah nongshong shnong ban ïa wad paidbah ha kaba la bteng kumba 2 taiew ei ei, hynrei ka jingïawad ïa ka met utei u rangbah kam shym la seisoh bad ym shym la lap dien satia.
Shuh shuh, u la ong ruh kane ka jingbym lap ïa ka met jong utei u rangbah ka la pynsah umdum shisha ïa ka ïing ka sem bad wat ïa ka bor shnong bad kumba long haduh mynta na ka liang ka ing ka sem ka dang pynlong hi ïa ka jingïawad bad wat kito ki nongshong shong ruh kiba lait por ki ju leit ïarap ban leit wan bad ka long pat kaba sngewsih ha kab wat la ka shnong bad ka ïing ka sem ki la ïa wad shitom bad ym lap satia pat ïa ka met utei u rangbah ba la shah rong ha um, u la bynrap.
