Dang pyrkhat ka Sorkar ban pyntreikam ïa ki aiñ pyrshah ïa ka jingkynnoh menshohnoh bad menaiksuid

Shillong, Naiwieng 11: Ka sorkar jylla ka la pyrkhat ban pyntreikam ïa ki aiñ ban ïakhun ïa ki kam kynnoh ai ksuid kiba dei ki kam runar kiba la mih bha ha kine ki sngi.
Ha kaba ïadei bad kane haba kren bad ki lad pathai khubor ha ka sngi baar u nongai aibuit ka sorkar jong ka tnat Social Welfare u Bah Paul Lyngdoh u la ong ba kane ka dei ka kam jong ka aiñ bad hap ban pyndonkam ïa ka jingmut jingpyrkhat naba kane ka dei ka kam kaba la ngeit naduh hyndai hynthai hynrei ha kajuh ka por la hap ïaid lang bad ki kam ki aiñ.
U la ong ba kane ka kam ha kaba ïadei bad ka jingngeit ksuid ka donkam ka jingïasyllok bad ki Autonomous District Council (ADC) bad ka tnat ki kam aiñ jong ka sorkar jylla.
“Namar ka jingdonkam jong kane ka kam ngi la shem ïa kiba bun ki jingjia ha kine ki snem ba la leit hynrei ngi donkam pat ban ïakhun bad ïaid katkum ka aiñ, ngi donkam ruh ban ïasyllok bad ki autonomous district councils (ADCs) naba ma ki ruh ki don ïa ka tnat aiñ ha la ki jong ki jaka treikam ne ba ki ADC dalade ki don ha ka kyrdan ban thaw ïa ki aiñ bad ban ïoh ka jingmynjur jong u Lat halor kane ka kam,” ong u Bah Lyngdoh.
U la ïathuh ruh halor ka jingjia ha Khliehshnong Sohra, dangshen ha kaba ki pulit ki la lah ban tem ïa kane ka kam ha ka por kaba kloi bad ïada ïa katei ka longïing na ka jingshah thombor ha kaba 9 ngut ki la shah kem bad shah pynngat ha ki aiñ bapher bapher.
“Ka tnat social welfare ka la shim bynta ban pynthikna ïa ki kam ban ïarap ïa ki longïing bad ki lad jingïada ïa ki bad kine ki lanot ki la wanphai sha la ïing hadien ba ki la ïoh ïa ki lad jingïada,” ong u Bah Lyngdoh.
“Mar mar ka tnat ka la shim khia ha kaba ïadei bad kane ka jingjia ban ïarap ïa kito ki longïing kiba mad ïa kane ka jingeh,” ong u Bah Lyngdoh.