Shillong, Lber 22: Ka Meghalaya ka dang lamkhmat ha kaba sdang jong ka lympung ïalehkai Col CK Nayudu Trophy pyrshah ïa ka Sikkim ha ka jingïakhun ha ka sngi Ba-ar ha Bhubaneshwar.
Ka Meghalaya kala ai kamai 48 ron bad shim 4 wicket pyrshah ïa ka Sikkim hadien ba kala kam ban tied nyngkong.
Haba phai sha ka jingïakhun, ka Meghalaya kaba la tied nyngkong na ka jingïakhun jong ka plate group, ka kamai 189 ron bad shah pynkhyllem lut baroh ki wicket ha ki 72.3 over. U Md Ashif Khan marwei u kamai 83 ron bad u Kumar u la ïarap kamai 27 ron. Kitei ki arngut kila buh da 84 ron na bynta ka Meghalaya ha ka jingduh noh khyndai wicket bad kamai da 100 ron.
U Joydeepan Deb (25), Nishanta Chakraborty (19) bad Arien B Sangma (15) kidei ki lai ngut kiba la ïarap kamai ron na bynta ka Meghalaya.
Ka Sikkim haba beh ïa ka thong ka kamai 19 ron bad shah pynkhyllem noh 4 wicket ha ki 15 over, ha kaba u Kumar (3/26) bad u Bipin Kumar Ray (1/9) kila khur wicket, shwa ba u Arun bad Ingsho Limboo kila ïarap ïa ka Sikkim ban kamai 48/4, bad ka dang donkam sa 141 ron.
