Nongstoiñ, Naiwieng 24: Naduh ba ki nongtrei ka tnad ba dei peit ïa ka pule puthi kiba la tip kum ki Cluster Resources Person, ki la sangeh ban lum ban lang ïa ki khynnah kiba 14 snem shaneng, kiba la pep skul shiteng por ba kin bteng biang ïa ka jingpule, ki khynnah kiba pep skul shiteng por ki la sdang kynrei biang.
Ha ki snem ba la dep, ka sorkar lyngba ka tnad ba peit ïa ka pule puthi, ka ju pynlong ïa ki enrollment drive ha man la ki jaka na ka bynta ban pynshai paidbah bad ban pynsgewthuh ïa ka jingkordor jong ka jingnang jingstad. Lyngba ka jingpynlong ïa kitei ki enrollment drive, ka jingpep skul shiteng por jong ki khynnah kiba 14 snem shaneng ka la sdang ban duna bha. Hynrei ha kine ki khyndiat snem, ka jingpep skul shiteng por hapoh West Khasi Hills, ka la sdang ban kiew biang.
Haba pyrshang ban lum jingtip bniah halor kane, la lap ba kiba bun na ki khynnah kiba pep skul shiteng por ki dei kiba na ki nongkyndong. Ka daw ka long ba ki don ki kmie ki kpa ki bym pat nang ban ñiewkor ïa ka jingnang jingstad, don ruh kiba ïakynduh jingeh ban pah skul ïa ki khun, namar ba ban ka jingduk bad ki khun shynrang kiba la 14 snem sha neng ki hap ban leit bylla ban kyrshan ïa ka ïing ka sem namar ba ban ka jingduk jingkyrduh.
Nalorkata ki don katto katne kiba pep skul shiteng por namar ka jingshongkha khlem dei por. Kawei pat ka daw ka long ba ki skul kiba don ïa ki nonghikai kiba la biang, ki don tang ha ki jaka kiba la long sor. Ha ki nongkyndong, ki shem jingeh ban phah skul ïa ki khun, namar ka jingkiew dor jong ka bai wai ïing.
Ka jingkiew dor ha ki mar ki mata, ka jingkiew ka bai skul, ka bai kot bai sla ka ktah haduh katta katta ïa ka ïing ka sem. Kane ruh ka pynlong ïa ki kmie ki kpa ki ba duk ba kim banse ban pyn pep skul noh ïa ki khun.
Halor katei ka bynta, lada ki bor sorkar kiba dei peit ïa ka pule puthi ki sngewkhia ki la dei ban thaw ki lad ki lynti kumno ban pynshlur ïa ki khynnah, ba kim dei ban pep skul tang shiteng por da kaba thaw ki lad jingïarap ban btin lynti lem ïa ki lada ki dei kiba duk palat.
