Dang im ka jingkyrmen ka Meghalaya naba rem ka Sikkim ha ka Arunachal

Shillong, Nohprah 21: Ka Meghalaya ka la ïoh ïa ka jingkyrmen kaba donkam tam ha ka lympung Senior Men’s National Football Championship na ka bynta ka Santosh Trophy 2025-26 hadien ba ka Arunachal Pradesh ka la pynliem ïa ka Sikkim da 1-0 kol ha ka jingïalehkai kaba ar jong ka wat ïakhun ba nyngkong (Preliminary round ) ha ka Group E kaba la long ha madan First Ground-SSA Stadium, Polo, hynne ka sngi U Blei.
U Rinchin Dorjee Karma u la thep ïa ka kol kaba dei artad ka namtam ha kane ka jingïakhun ha ka minit kaba 57 na ka bynta ka Arunachal.
Lah ban kdew hangne ba ka jingïakhaid ne jingjop ïa ka Sikkim kan jin da la weng noh ïa ka jingkyrmen jong ka kynhun ïalehkai ka jylla kaba ïakhun hala ïing na ka jingïakhun ban ïoh ïa ka jaka ha ka wat ïakhun ba khatduh (final round). Ka Meghalaya ka la mad ïa ka nam rem ha ka Sikkim ha ka jingïalehkai ba nyngkong ha ka sngi Thohdieng da 2-1 kol. Kumba ka long mynta, ka Arunachal bad ka Sikkim baroh ar ki la kamai mar 3 poiñ bad ka Meghalaya ka donkam ban pynliem ïa ka Arunachal ynda kine ki arliang mamla kin ïakynduh ha ka sngi Ba-ar (23 tarik Nohprah). Kane ka jingïalehkai kan sdang ha ka por 4 baje janmiet.
Ka jingjop na ka bynta ka Meghalaya kan buh ïa baroh lai tylli ki kynhun ban ïoh 3 poiñ, bad lada ka long kumta yn hap ban bishar ïa ka jingïapher kol hapdeng jong ki. Watla katta, tang ka jingjop kaba da 1-0 kan nym biang ïa ka Meghalaya ban pynthikna ïa ka jaka; hynrei ka jylla kan hap ban thep ym duna ïa ka ar kol ban bat hi ïa ka kyrdan ba ha khlieh duh ha ka Group E. Katba ka Arunachal pat kan donkam tang ban ïakhaid ban jam shakhmat.
ïa kane ka jingïalehkai hynne ka sngi, la sakhi lang da u Treasurer jong ka All India Football Federation u Kipa Ajay bad u President ka Meghalaya Football Association u Bah Hamletson Dohling.
Ka kylla step ka la kut noh khlem don ba lah ban pynkhihjar. Nangta hadien katto katne minit ba la ïaid ka kylla miet u Rinchin Dorjee Karma u la ïoh ban pynkhih ïa ka jar ban buh hakhmat ïa ka Arunachal.
Ka Sikkim ka la dep ban pynshisha ïalade kum ka kynhun kaba ym ju kynrandien ha ka jingïalehkai ba nyngkong pyrshah ïa ka Meghalaya, ka la pyrshang tyngeh katba lah ban tur shakhmat ban ïoh ïa ka kol pynïakhaid. Ki la don katto katne ki jingpyrshang kiba thikna na u John T Lepcha, hynrei u rangap kol ka Arunachal u Jagom Loyi u la sei ïa ka sap ba kyrpang ban khanglad bad ban pynneh pynsah ïa ka kol lamkhmat jong ka Arunachal – kaba la don ruh ka jingktah ban pynneh pynsah ïa ka jingkyrmen jong ka Meghalaya.