Nongstoiñ, Naitung, 25: Ka jingshna ïa ka jingkieng ha ka wah Kynshi kaba hap ha ka shnong Kynroh da ka kompeni kaba pyntrei ïa ka surok Nongstoiñ–Wahkaji kaba la sdang naduh u bnai Rymphang mynta u snem ka dang iaid shait shait haduh mynta bad kan dang shim por ruh ban pyndep.
Ki nongshong shnong na ka thaiñ haba pyntip ha u nongthoh khubor ki la ong ba ka jingshna ïa ka jingkieng ka long kaba suki shaba palat watla ki nongtrei ki don manla ka sngi.
Ki la ong ruh ba ka jingsuki jong ka kompeni ban shna ïa ka jingkieng ka la pynlong ïa ki kali heh kum ki bus, ki trok na ka thaiñ Nongstoiñ kiba don kam ban leit buh mar sha Mawkyrwat bad kiba na ka thaiñ Mawkyrwat ruh kiba thmu ban leit buh mar sha Nongstoiñ kat bym pat dep ban shna ïa ka jingkieng ki hap ban ïaid na ka surok na Jashiar sha Parïong haduh Nongshilong bad hiar arsut sha Nongstoiñ bad kumjuh ruh kiba na Nongstoiñ ki hap ban ïaid na katei ka juh ka surok shaduh Mawkyrwat.
Nalorkata ki nongshong shnong ka thaiñ ki la ong ruh ba la kumba katto katne bnai ki kali kiba lah ban ïaid lyngba ïa katei ka surok haduh Mawkyrwat ki dei tang ki kali Sumo, Mahindra Pickup bad ki kali rit kumta kam pat da ktah eh ïa ka leit ka wan jong ki briew hynrei ka ktah tang ïa ki kali heh kiba leit ban buh mar na Nongstoiñ sha ki thaiñ Umdohlun , Wahakji bad kiwei kiwei ki shnong ha ka thaiñ Warsanlyngdoh.
Ha kaba ïadei bad ka jingsuki ïa ka jingshna ïa ka jingkieng, ki nongshong shnong jong ka thaiñ Kynroh, Nonglwai, Nongkynjang, Rangblang bad na ka thaiñ Warsanlyngdoh ki la kyntu ïa ki bor pynïaid jong ka kompeni kaba pyntrei ïa ka jingkieng ba kin kham pynkloi ban pyndep khnang ba kan pynduna ïa ka jinglut haba phah kit mar ha ki kali heh.
Ki la ong ruh ba kumba ka long baroh shi katta bun ki nongshong shnong ka thaiñ Warsanlyngdoh kiba kit ïa ki nar rod, dewbilat bad kiwei kiwei ki mar khia ki ju thied na Nongstoiñ kumta ka jingshna pyndep ïa ka jingikieng ka long kaba donkam bha.
