Dang ïai kynmaw ka KSU ïa u samla (L) Paul Biswal Makri kum u samla ba shlur ka jaid bynriew

Nongpoh, Jylliew 21: Ban dang ïai kynmaw ïa ki kam ba shlur bad ki jinglen lade uwei na u samla na ka dong Ri Bhoi uba la don bynta ban ïa khun pyrshah ïa ki mynder na ka bynta ka dawbah ka jaid bynriew, ka Khasi Students Union Western Bordern Area ha ryngkat ka KSU Umrit Unit ba hap ha ka jylli teikam ka KSU North Khasi Hills District Unit dang shen ki la leit kynduh kyrpang ïa kiba haing hasem utei u samla kum shi bynta ban ai mynsiem bad ruh ba pyrto ïa ki kam ba la leh bad aiti met bad mynsiem da une u samla ka jaid bynriew.
Kum ban pynkynmaw ne kyrtiang dien sha ka mynnor, 35 snem mynshwa ha u snem 1987 ha ka por ba dang khluit bha ka jingïakhih ‘Anti-Foreigners’ Movement’ hapoh jylla, ka la don ka jingsynreit kuli pathar jong ki pulit CRPF ïa ki samla Khasi bad ïa ki ïing Khasi ha u bnai Jylliew 1987 khamtam ha ki thaiñ Motphran, Mission Compound, Mawkhar, Jaiaw, Umsohsun, Wahingdoh bad Riatsamthiah. Kane ka jingïakynad ka la khih phaloh bha ha ka 15, 16 bad 17 tarik u Jylliew 1987 ha kaba da ki phew ngut ki dkhot ka KSU ki la shah siat bad mynsaw jur. U president ka KSU ha kato ka por u (L) Bah Bull N Lyngdoh ruh u la shah tied dusmon ha ki pulit bad shah set along.
Dei ha ka 17 tarik u Jylliew 1987, u samla Paul Biswal Makri uba dei u KSU volunteer u la shah siat na khlieh ha ki thaiñ Motphran bad u la kyllon ïap ha shen. Ryngkat bad u sa uwei pat u samla u la ïap ha kaba u kuli sorkar u la ksam lyngba ka iing jong u bad dung prak ïa u. Kane ka jingïap u Paul Makri ka la pynkhih win ïa ka Jaidbynriew bad ka jingïakhih kaba jur bha ka la bteng haduh 1 snem kynthih.
Haba phai sha u Samla Paul Makri ha kane ka por ba u shah siat ïap u dang 19 snem ka rta bad u dang don hapdeng ki jingpule skul ha Government Boys Secondary School bad Karate (white belt) ha YMCA. La kha ïa u ha ka shnong Umrit ha Ri Bhoi bad ha Shillong u sah wai ha Jaiaw.
Haba kren halor kitei ki jingïakhih kiba la khluid bha ha kitei ki por, ki paidbah kiba ïathuh khana ki ong ba la don kiba la kyntu ïa u samla Paul Makri ba un phet noh na ka jaka ïa khih haduh ar sien bad kadaw ka long ba ki pulit CRPF ki la synreit kuli pathar ïa ki paidbah, hynrei u Paul Makri u la pyneh triang bad ïai bteng ban ïa don bynta bad ki para dkhot ka KSU kiba dang ïa khih ha Motphran tad haduh ba un da shah siat bad shah kit ïa ka met sha Civil Hospital.
La tep donburom ïa u Paul Makri ha lum jingtep Katholik ha Mawprem.
Dei halor kitei ki kam shlur u samla Paul Makri kaba long ka jingai mynsiem ïa ki samla ka jaid byrniew, ka KSU Western Border Area, dang shen ha ka 17 tarik u Jylliew 2022, ki la leit ban ïa kynduh ïa kiba haing ha sem utei u samla bad ha kajuh ka por ban kynmaw burom ïa kane ka jingkhlad noh jong u na kane ka sla jong ka pyrthei kaba dei na ka daw kaba kum u samla u la kit la bah kumno ba ïada ïa ka jaid bynriew bad ki kam shlur jong u kin ïai pyrto bad kin dang long ka nuksa na ka bynta ki shipai jong ka jaid byrriew.
Ka KSU lyngba kane ka kyrwoh halor kitei ki kam shlur utei u samla, ka la pynsngew sha ki poiei bad sha ka sorkar ba ki bun ki dkhot ka seng ki ba la aiti ïa la ka jingim na ka bynta ka jaid bynriew (Martyr) ha ka jingïaleh bad kiba mynta ruh ki dang pahuh kiba kloi ban aiti ïa lade na ka bynta ka dawbah ka Jaidbynriew tad haduh ba ka Ri Khasi kan khuid phar na ki mynder buhai shnong.