Khliehriat, Jylliew 18 : Ka jingïai bteng ka jingtwa ha ka surokbah NH-6 hajan ka tunnel Sonapyrdi ka dang buh jingma haduh mynta ruh ïa ki nongleit nongwan watla ki kali ki la sdang ban lait khyndiat khyndiat shilliang ka surok.
Ki tyllong khubor ba la ïoh lum ki ïathuh ruh ba lada u slap u dang ther biang ka lah ban jia biang ka jingtwa bad jinghap ka khyndew ktieh ha katei ka jaka. Kumta halor kane ka jingjia, na ka liang ki pulit ki la kyntu ïa baroh kiba ïaid lyngba na katei ka surok ba ki dei ban da long adkar bad husiar bha ïoh kan jia biang ka jingtwa khyndew.
Shuh shuh ki la kyntu ruh ba dei ban kiar katba lah ban ïaid na katei ka surok lait noh tang ha ki kam kiba donkam kyrkieh eh. La kyntu ruh ïa ki nongleit nongwan ba kin wad noh da kiwei ki lynti namar ka surok ha Sonapyrdi ka dang buh jingma bad ka jingdheng kali ruh ka dang don haduh mynta.
Na ka liang ka tnad, ka kyntu ruh ïa ki paidbah kiba ïaid lyngba kane ka surok ba kin rah lang ruh ïa ki jingbam bad ka um khnang ba kan ym buh jingeh ïa ki lada jia kano kano ka jingdheng kali.
Ha kajuh ka por ki nongtrei ka National Highway Authority of India ki dang trei shaid shaid ban pynkhuid ïa ka surok kaba la dap da ka khyndew ktieh bad ki maw kiba la tap ïa ka surok baroh kawei.
