Shillong, Naitung 19: U Myntri ba peit ïa ka tnad Poh Ïing jong ka sorkar jylla u Bah Lahkmen Rymbui ha ka sngi 19 tarik Naitung u la kam ba ka kaiphot tohkit kaba la aiti da u Justice T Vaiphei hadien ba u la dep pynlong ïa ka jingtohkit ka dang don bad ka tnad Personnel jong ka sorkar jylla ïathuh u Bah Samuel Biam President ka Seng Samla Mawlai Pyllun(SSMP) hadien ka jingïakynduh bad u Myntri.
U Bah Samuel u la ïathuh ba ka seng ka la leit ban buh ha khmat jong u ba ka sorkar kan pynlait paidbah noh ïa ka jingtohkit halor ka jingshah siat ïap u Bah Cheristerfield Thangkhiew ha ka ïing sah jong u ha ka 13 tarik Nailar 2021 ha Mawlai Kynton Massar.
“Na ka liang u Myntri u la ïathuh ba ka kaiphot ka dang don bad ka tnad Personnel jong ka sorkar bad na ka liang jong nga ruh ngan leit kyndeuh bad u Myntri Rangbah ban pynsted ba un pynlait noh ïa ka kaiphot jong ka kynhun tohkit” ong u Bah Samuel.
Lah ban kdew hangne ba ka sorkar jylla ka la aiti tohkit ha u Nongbishar ba la shongthait, u T Vaiphei halor kane ka jingshah siat u nongïalam barim ka HNLC ha ka 13 tarik u Nailar 2021. Na ka liang u Nongbishar u ladep aiti ïa kane ka kaiphod naduh kine ki bnai baladep.
