Shillong, Naitung, 13: U Myntri Rangbah ka Jylla u Conrad Kongkal Sangma ha ka sngi Balang u la ïathuh ba ka Sorkar Jylla ka dang pule bniah ïa ka kaiphod tohkit jong u nongbishar ba la shongthait u Justice T. Vaiphei halor ka jingshah siat ïap jong u nongïalam barim ka Hynñiewtrep National Liberation Council (HNLC) u Bah Cherishterfield Thangkhiew ha ka 13 tarik, Nailar, u snem baladep.
“Ngi la ïohpdiang ïa ka kaiphod bad ngi dang bishar bniah ïa ka. Namarba ka dei ka kaiphod tohkit kaba jrong, ngi donkam ban ïoh kham bun ka por bad ngin sa pyntip sha phi kaei kaba mih na kane ka kaiphod,” ong u Conrad ha ka jingïakren bad ki lad pathai khubor.
Kane ka jingkren jong u Myntri Rangbah ka long hadien ba ka Sur Ki Nong Mawlai ka la dawa ïa ka Sorkar Jylla ban pynbna paidbah noh ïa ka kaiphod tohkit.
U Justice T. Vaiphei u la aiti ïa ka kaiphod tohkit sha ka Sorkar ha ka 20 tarik, Jymmang hadien ka jingtohkit kaba jlan haduh hynriew bnai kynthih bad hadien ba la shong bishar haduh 20 sien.
Kumba 12 ngut ki nongsakhi ki la leit mih hakhmat ka Commisssion ban ai sabut halor kane ka jingjia kaba la pynkhihwin ïa ki paidbah nongshong shnong jong ka shnong Mawlai ha u snem baladep.
