Nongstoiñ, K’lyngkot 07 : Ka jingwan trei jong ki nongtrei sorkar ha ki tnad trei kam bapher bapher kiba don ha Nongstoiñ haduh mynta ka sngi balang ka 7 tarik Kyllalyngkot kam pat da long ka ryntih namar ka jing don jong ka shuti snem thymmai hynrei wat la kim nongtrei kim pat poi 100% ruh kumba marshiteng ki la wan trei ha ki ophis ba ki trei. Haba pyrshang ban ïakren bad ki nongtrei kiba la wan sha ki ophis jong ki naduh ka lah sngi u blei jong kane ka taïew ka 5 tarik Kyllalyngkot ki la ong ba ka jingbym pat wan lut jong ki nongtrei ha ki ophis ka lah ban dei namar ba ha ka por tlang ki bun ki kam kiba ki hap ban leit shane shatai kum ki kam ïng kam sem, ki kam khawai dawai, bad kiwei kiwei bad kumba ka long ha ki snem ba la dep baroh dei naduh ka taïew ba ar jong u bnai ba nyngkong ter ter bad wat la ki don teng teng kiba pep trei hynrei ka jingpep jong ki ka dei namar ba ki don ha ki met ki bym shait bym khlaiñ bad ki kam ki bym lah ban kiar kum ka jingkhlad noh jong kiba ha ïng ha sem jong ki.
Nalor kata kumba long ha ki snem ba la dep baroh ka jing trei kam jong ki ophis sorkar ha Nongstoiñ ka long kaba ïaid beit bha lait noh tang hangne hangtai ba ki don ki kam kiba sahteng namar ki daw bym lah ban tip. Nalor kata ka Election Branch kawei na ki tnad treikam kaba don kam eh kadei kawei na ki tnad trei kam kaba ïaid beit bha bad kaba bud ryntih ba ïa ki kyndon ba la buh da ka Election Commission of India bad nangne sha khmat ka don ka jingkyrmen ba katei ka tnad trei kam kan nang kham pynjanai shuh shuh ïa ka jingtrei kam kat kum ka juk kaba mynta bad lada nujor ïa ka jingtrei kam jong ka tnad ba dei peit ïa ka Election na baroh khatwei tylli ki district hapoh ka jylla ka West Khasi hills ka dei ka district kaba tbit bad kaba shem phang tam ha ka jingtrei kam kaba ïadei bad ka Election.
