Shillong, Naitung 10: U Transport Secretary ka sorkar jylla u DD Sangma u la kubur ba ka Shillong ka dang duna bha halor ki jingtei kiba donkam bad kumjuh ruh ka jingduna ki nongtrei kiba donsap ne ba tbit halor ki kam technology haba ïadei bad ki kali ba la pynïaid da ka bording elektrik (electric vehicle (EV) technology.
Ïa kane u D D Sangma u la kren ha ka workshop halor ka ‘Electrifying Shillong: Accelerating Electric Vehicle Adoption and Charging Infrastructure’, ha ka prokram da kaba kren ruh shaphang ka jingpdiang ïa ki kali ba pynïaid da ka bording elektrik ha ka jylla.
Watla ka sorkar jylla ka la wanrah ïa ki jingai jingmyntoi ne ki jingpynshlur ban kyntiew ïa ka jingdonkam ban pynïaid ïa ki kali elektrik, hynrei ka jingdon jong ki pat ka dang long kaba dang duna bha, wat la ïohi ïa ka jingsdang ban don bun ki electric scooter ha ka jylla.
Haba pynpaw ka jingsngewkhia halor ka jingduna ka jingdon ki technician, u Sangma u la ong, “Ka jingpdiang ïa ki kali ba pyntreikam da ka bording elektrik ha ka jylla ka dang long kaba suki bha. Ngi dang duna bha ki jingtei kiba kongsan bad kumjuh ruh ka jingdon ki nongtrei kiba la pyntbit ha kane ka kam.”
Wat hapdeng kine ki jingïaleh ba donkam, na ka liang u Sangma u la pynpaw ka jingkyrmen ha kaba u la ai khublei ïa ka Convergence Energy Services Limited (CESL) bad ki paralok kiba la pynkhreh ïa ka jingdawa Electric Vehicle (EV) ka jingkheiñ ba bniah na ka bynta ka Shillong. Kane ka jingwad bniah kan ai ka sakhi halor ki jingpyrshang ban buh hakhmat ban pyndon bun ki kali ba pyntreikam da ka bording elektrik.
Ka Meghalaya ka la wanrah ïa ka EV policy ha u snem 2021 hynrei kane kan kutnoh ha u bnai Lber 2026. Na ka liang u Sangma u la banjur halor ka jingdonkam ban shim jingkheiñ biang bad ki jingpyrshang ban kyntiew ïa ka jingdon ki kali EV kiba ïaid ha surok. “Ngi la ai ki lad jingmyntoi hynrei ka jingdon ki kali pat ka dang long kaba suki ban kiew. Hynrei ngi la ïaid shakhmat bad ngi la pynlong ruh ki jingpynsngewthuh paidbah halor ka jingdonkam ban kyntiew ka jingdon kine ki kali,” u la ong.
