Dang don ka lad ban phai dien biang halor ka MOU ba soi ka Assam bad Meghalaya

Shillong, Ïaiong 21 : U nongïalam ka UDP ba dei ruh u MLA na Ri Bhoi, Bah Mayralborn Syiem u la ong ba ka lad ka dang don ban phaidien biang ïa ka soskular pynbeit pud ba la soi hapdeng ka Meghalaya bad Assam haba ïadei bad ki hynriew na ki 12 tylli ki jaka kajia pud hapdeng kitei ki ar tylli ki jylla.
Haba kren bad ki lad pathai khubor, u Bah Mayralborn u la ong ruh ba ka soskular kaba la soi ha ka 29tarik u Lber jong u snem ba la dep kam dei satia kaba khatduh hynrei u ong ba ka Parliament kan sa shim ïa ka rai kaba khatduh halor kane ka bynta. “Kumta, ka don ka lad ban phai dien biang halor ka MOU.”
Shuh shuh u ong ruh ba ka jingphaidien biang ïa ka MOU kadei kawei na ki mat ïakhun elekshon jong ka UDP.
Haba jubab halor ka jingkylli ba u Myntri Rangbah u la dep kren shai ba un ym phaidien shuh ïa ka MOU ba la dep ban ïa soi, na ka liang utei u MLA ka UDP u la ong, “Kata ka por hi kan sa batai.”
Katkum ka jingong jong u ha ka kylla kaba nyngkong jongka jingïakren pynbeit pud, ka la don ka jingpyrshah bad ka jingbymsngewtynnad na ki katto katne ki liang namar bun ki pynpaw ba kim sngew hun satia.
“Ki Regional Committee jong ka sorkar ki la pyrshang ban ïa kren ïa kine ki bynta katkum ka jinglah jong ki, hynrei kane ka ishu kadei kaba phim lah satia ban pynhun ïa baroh 100 na ka 100. Kan don beit ka jingbym hun namar ki don ki briew kiba kmen bad don ruh kiba sngewsih hynrei ha kaba kut jong ka sngi, ka sorkar hi ka hap ban shim ïa ka rai,” u la ong.
Da kaba ïaroh ïa ka sorkar MDA kaba la shim ïa ktei ka sienjam ban pynbeit pud, u Bah Mayral u la ong ba ka sorkar MDA ka la pyrshang bad kumta ki kwah ïa ka jingkyrshan jong ka sorkar namar ki sngewthuh ba ha ka synshar laitluid, ka jingkynthoh kan don beit. Kumta halor kane ka bynta ruh u ong ba ki khmih lynti ba kan don ka jingai jingmut kaba tei.
U ong ruh ba ka UDP kan buddien ïa kane ka ishu bad kan treilang bad ka sorkar na ka bynta ka jingmyntoi jong ki paidbah.