Shillong, Jymmang 11: U Symbud Myntri Rangbah ka Jylla Bah Prestone Tynsong hynne ka sngi balang ula ïathuh ba ka Sorkar Jylla ka dang ïai buddien bad ka Sorkar Pdeng halor ka jingdawa ban weng noh ïa ka jingtreikam jong ka Citizenship Amendment Act (CAA) ha Jylla bad kumjuh ban pyntreikam ïa ka Inner Line Permit (ILP).
Kat kum ka jingong jong u, ka Sorkar Pdeng kala pyllait tang ïa ki jaka jong ka Sixth Schedule na ka jingtreikam ka CAA ha Jylla da ka jingpynbor ka Sorkar hapoh ka jingïalam u Myntri Rangbah Conrad Kongkal Sangma lem bad kiwei kiwei ki Political Party ka thaiñ Shatei Lam Mihngi.
Haba kylli, u Bah Prestone ula ïathuh ba ka CAA ka la treikam tang ki 3 % ki jaka ka Jylla ïa kiba la tip kum ka European Ward. U ïathuh ba ka jingiakren kala ïaid bad ka Sorkar Pdeng ban pyllait noh phar ïa ka Meghalaya na ka jingtreikam kane ka Aiñ kaba pdiang ïa ka jinglong nongshongshnong ïa ki pherwir Hindu, Khristan, Sikh, Jain, Buddhist na Afghanistan, Pakistan bad Bangladesh.
“Ngi la dep phah dorkhas halor kane ka kam kaba long kumjuh bad ki jingdawa jong ki kynhun bapher bapher kynthup ki Sengbhalang. Ngim pat ïoh ktien satia na ka Sorkar Pdeng bad u Myntri Rangbah ka Jylla u dang ïai buddien ïa kane” ula ïathuh.
Haba kylli, u Bah Prestone ula pyntip ba ka CAA kala sdang treikam naduh u snem 2014 hashuwa ka Amendment hynrei haduh mynta, ym pat shym la don uwei ruh u briew u ban pan ïa ka jinglong nongshongshnong ka Jylla Meghalaya hadien ba pynlong aiñ ïa ka Citizenship Amendment Act.
Halor ka jingdawa ïa ka Inner Line Permit (ILP), u Bah Prestone u ïathuh ba ka Sorkar ka dang ïai buddien bad ka Sorkar India bad kam shym la ïohthiah lyngngai ïa kane ka ishu kynthup ruh ka jingpynrung ïa ka Ktien Khasi bad Garo ha ka Eight Schedule jong ka Riti Synshar ka Ri India.
