Shillong, Risaw 17: U Myntri Rangbah u Conrad K Sangma ha ka sngi Thohdieng u la ong ba u la ïai buddien bad ka sorkar pdeng na ka bynta ban thaw noh la ka jong ka Meghalaya IAS cadre.
“Nga la buddien bad ïai tynruh ïa ka jingdonkam ban don noh ïa la jong ka Meghalaya cadre naduh u snem 2019, bad nga kyrmen ba ym slem shuh ba kane ka kam kan sa urlong bad jop. Ki jingkylla na ka bynta ki MCS ki dei ki bynta ba hakhmat, kumba ki long haba ki shakri ïa kiwei ki kam,” ong u Sangma.
Ïa kane ula ong haba kren ha ka Annual Conference jong ka Meghalaya Civil Service Officers’ Association (MCSOA) kaba la long ha State Convention Centre, Shillong.
U Myntri Rangbah u la ïaroh ïa ki ophisar MCS ïa ki jingaiti jong ki ha ka kam bad u la pynskhem ïa ka jingangnud ka sorkar ban pynkhlaiñ ïa ki kam jong ka jylla.
“Ha kaba kut jong ka sngi, baroh ngi ïatrei na ka bynta kawei ka thong- ban shakri ïa ki paidbah jong ka jylla jong ngi. Ym don ka kam, ym don policy, bad ym don ka rai kaba don jingmut lymda ngi pynkynmaw ïalade ba ka jingthmu jong ngi ka long ban wanrah ka jingkylla kaba bha ha ka jingim ki briew,” u la ong.
Haba kyntu ïa ki ophisar ba kin neh ha ka jingïalam da ka jingthmu bad ka kam shakri, u la ong, “Ki kyrdan bad ki rank kin kylla hynrei ka jingthmu ka dei ban neh kajuh.”
Haba banjur ïa ka jingdonkam ka jingsdang bad ka jingsngewthuh ha ka kam synshar, u la bynrap, “Ka India kan lah shisha ban sdang kylla haba ki riew saiñ pyrthei ki nang ban ong em bad ki ophisar pat kin nang ban ong haoid.'”
U la pynshlur ïa ka jingdonkam ka jingïasyllok kaba heh bad ka jingdonkam ban leit sha kiwei ki jylla ne ki ri lyngba ki program ki ban ai ki jingtip ba nyngkong halor ka synshar khaddar ha ki kyrdan ba shalor, ha India bad shabar ri.
Haba pynpaw ka jingkyrmen shaphang ka jingkiew ka Meghalaya, u la sam ïa ka jingtip ba ka jylla mynta ka la long kaba ar kaba kiew bha ka ïoh ka kot ha India, kaba la kynjoh 10% ka roi ka san bad kaba la khmih lynti ba kan kynjoh sha ka 12-14% ha ki snem ban wan. “Kane ka khana ka jingkiew ka dei ka jong ngi baroh,” u la bynrap.
Haba kren ha ka jingïalang, u Bah Cyril V Diengdoh, Commissioner & Secretary ka sorkar jylla, u la ïaroh ïa ka jingaiti jong ki ophisar MCS bad ka bynta ba kongsan ha ka synshar khaddar. U la kdew ba ki ophisar kiba shakri hakhmat ha ki kam sorkar ha ki kyrdan bapher bapher kum ka kam Sub-Divisional Officer, Block Development Officer, Additional Deputy Commissioner bad ki Secretary ki long kiba kongsan.
U la pynthikna ba ka sorkar ka long kaba angnud ban pynbha ïa ki lad ki lynti, ba kynthup ïa ki ïing ha Shillong bad pynshai ba kine ki kam ba ïadei bad ka jingkyntiew kyrdan ïa ki IAS cadre, da kaba ïathuh ba ki jingïakren bad jingpynbeit la dep ban phah sha UPSC bad ka DoPT ban pynlong ïa ki kam kyntiew kyrdan.
U la pynpaw ïa ki kam jong ka sorkar kiba dang ïaid ha ka ban pynthikna ïa ka jingthungkam kaba manla ka por ïa ki MCS bad sam ruh ïa ki jingtip ba bniah halor ki prokram ai jinghikai, kynthup ka jingjied ban shah hikai shabar bad ka Mid-Career Training kaba dang wan ïa ki officer ki ban don bynta ha ki kam thaw aiñ.
Haba kren lamphang, u Ashish M. Sangma, President ka Meghalaya Civil Service Officers’ Association, u la pdiang sngewbha ïa u Myntri Rangbah bad ïaroh ïa ki jingïaibteng jong u ban ai ka jingkyrshan. U la pynshlur ïa ki ophisar khamtam kiba dang shah thung kam thymmai ban shakri da ka jingsbun, ki jingïakhun bad sngewrit bad banjur ba ka jingthew ba shisha ïa ki kam ki ophisar ka shong ha ka jingsngewhun jong kito kaba ki la shakri.
U la pynpaw ruh ruh ïa kiba bun ki jingtyrwa sha ka sorkar kaba kynthup ka jingithuh ïa ka MCS kum ka premier State service, ki posting MCS officer kum ki Deputy Commissioner ha ki district ba la jied, ban kyntiew kyrdan ïa ki ophisar kiba la rangbah, ka jingkyntiew kyrdan kaba ïaid da ka por, ka jingpynduna ïa ki snem ban long ba bit na ka bynta ka jingkyntiew kyrdan, bad ka jingbishar biang ïa ka rta shong thait na ka 58 sha ka 60 snem ka rta. U la ïaroh ruh ïa ka rai ka sorkar ban pynskhem ïa ki kam contract, da kaba ong ba kane kan ai jingmyntoi ïa kiba bun ki longïing.
Ha kane ka sngi la donlang ka Kong R. M. Kurbah, Deputy Commissioner, East Khasi Hills, u Bah Alexander S. Mukhim, Deputy Secretary, Chief Minister’s Secretariat, nalor kiwei kiwei.
Ïa ka prokram la pynkut da ki kyntien ai khublei na u Bah B. J. Kharshandi, Director, Directorate of School Education and Literacy (DSEL), da kaba ithuh ïa ki jingnoh synniang jong u Myntri Rangbah, ki ophisar ba ka rangbah, bad baroh ki MCS officer halor ki jingaiti bad ïashim bynta jong ki ha kane ka jingïalang.
