Dang bishar ka tnad kam pohïing ïa ka kaiphod halor ka jingpyndonkam AIG 29 tylli ki kali

Shillong, Nailar 31 : Ka tnad kam pohïing jongka jylla ka dang bishar bniah ïa ka kaiphod ba la pynkhreh da ka kynhun tohkit ki pulit halor ka jingkynnoh pyndonkam bakla u AIG (A) u bah G.K Iangrai ïa ki 29 tylli ki kali.
Haba kren bad ki nongthoh khubor u myntri kam pohïing u ma Lahkmen Rymbui u la ïathuh “Ka Police Head Quarter ka la phah ïa ka kaiphod sha ka tnad kam pohïing ba dei peit ïa ki pulit bad mynta ka tnad ka dang bishar bniah ïa kane ka kaiphod bad hadien kane ïa kaei kaba dei ban leh ka sorkar kan sa leh ïa kaba donkam. Lada donkkam ban thung ïa ka jingtohkit ruh ka sorkar kan thung da ka jingtohkit ba laitluid ban tohkit bniah shuh shuh. To ngin ïai ap sa shisngi ne arsngi namar hadien kata ngin sa tip kaei ba dei ban leh na ka liang ka sorkar”.
Haba la kylli hato ka sorkar kan weng kam shipor ne sospon ïa une u pulit ophisar, u ma Lahkmen u la ong hap bud ïa ki kyndon ka aiñ . “ Uno uno u ophisar ne u briew la u leh ïa kano kano ka kam hap ailad ïa uta u briew ruh ban ïada ïa lade bad hadien kata yn sa leh pat ïa kaei kaba dei ban leh” ong u ma Lahkmen.
U la ong ki jingkynnoh kin jia bad mih beit barobor “ Ka shong pat kaei kaba ka kaiphod kan batai shai. Ngan ïathuh shai ïa phi ba ka tnad kam pohïing kan ym buhrieh ei ei ruh em bad kan ïaid kat kum ki kyndon ka aiñ hadien ba la dep bishar bniah ïa ka kaiphod shwa ban shim ïa kano kano ka rai ne leh ïa kano kano kaba donkam ban leh”