Shillong, Lber, 27: Ka jingdawa jong ki nonghikai skul Adhoc ïa ka Sorkar Meghalaya Democratic Alliance (MDA) ban kyntiew kyrdan Deficit ïa ki skul Adhoc kiba don hapoh ka jylla Meghalaya baroh kawei lehse kan ym lah ban urlong satia hynrei watla katta ka Sorkar ka dang bishar la kan mynjur neem ïa ka jingtyrwa ban pynkiew da ka tulop kaba T.18 hajar.
Ha ka 18 tarik u bnai Kyllalyngkot, 2022 u Secretary ka tnat Pule Puthi ka Sorkar Jylla u Ambrose Ch. Marak u la khot ïakren ïa ki nongïalam jong ka FASToM hadien ba la pynlong da ka jingïakhih hakhmat ka Main Secretariat, Shillong.
Ïa ki jingïatai bad ki jingai jingmut ha kane ka jingïakren, ka tnat Pule Puthi ka la phah lyngba ka Dak sha u President ka FASToM u Bah Kenneth Shadap uba long ruh ha kajuh ka por u President ka MUPSTA, ban pyntip ba ka tnat Pule Puthi kam shym la shong kli kti halor ki jingdawa jong ka Seng hynrei ka tnat ka la pynkhreh lut nadong shadong ha kaba ïadei bad ka jingtyrwa ban pynkiew ïa ka tulop jong ki nonghikai skul Adhoc da T.18 hajar bad nalor kata ban pynkiew pat ïa ka tulop da 5% tmanla u snem.
Ha kane ka jingïakren, u Secretary ka tnat Pule Puthi u la pynpaw sha ki nongïalam jong ka Seng ba ka Sorkar kan ym lah satia ban kyntiew kyrdan Deficit Pattern/Deficit Systems ïa ki skul Adhoc na ka daw ba ka Sorkar ka don hapdeng ka jinghiran ka Pla Tyngka.
Katkum ka jingai jingkheiñ jong ka tnat Pule Puthi, lada ka Sorkar Jylla kan ai jingmynjur ban kyntiew da T.18 hajar ïa ka tulop sha baroh ki nonghikai skul Adhoc naduh Lower Primary haduh Higher Secondary, ka jinglut kan long haduh T.13 klur antad ha ka shibnai bad T.156 klur ha ka shi snem.
U Bah Kenneth Shadap ha ka jingïakren bad u nongthoh khubor hadien ba la wai ka jingïalang bad ki nongïalam ki skul Adhoc na rilum Garo hapoh ka lama jong ka Meghalaya Upper Primary School Teachers Association (MUPSTA), u la ong, “ngi la ïakren halor ka shithi kaba la pynpoi sha nga lyngba ka Dak mynta la shitaiew. Kane ka dei shithi jong ka FASToM. Ngi la ïakren bha bad ngi la leit ruh sha ki Ophis ban buddien bha halor kane ka kam. Ngi la ïakren bad ki ophisar jong ka tnat Pule Puthi bad ki la pyntip ba la phah sha ka Sorkar bad ka Sorkar ka dang pynkhreh ban shimkhia ïa kane ka jingtyrwa jong ngi na ka bynta ban kynthup lang naduh ka kyrdan Lower Primary, Upper Primary, Secondary bad Higher Secondary.”
“Ynda ngi la ïakren bha bad ki ophisar, ngi sngewdei ban ai ka jingïatreilang bad ka Sorkar mynta u bnai Ïaiong bad Jymmang bad ngin sa peit ha ka taiew banyngkong jong u bnai Jylliew,” u la ong.
“Lada kam don kaei kaei kaba thikna, ngi ruh ngim banse ban shim ïa ka rai ban ïakhih. Shisien ba ngi la shim ïa ka rai ba ngin ïakhih, ngin ym sangeh shuh tad haduh ba ngin da ïoh ïa kaei kaba ngi la dawa,” la maham une u nongïalam ka MUPSTA uba dei ruh ha kajuh ka por u President ka FASToM.
U la ïathuh ba ki Ophisar jong ka tnat Pule Puthi ki la kyrpad lyngba u Bah Kenneth Shadap ïa ki nonghikai skul Adhoc kiba dang pynlong ïa ka jingïakhih kaba khlem pud sngi ba kin ïatreilang bad ka Sorkar Jylla na ka bynta ki ar bnai ki ban sa wan katba ka Sorkar Jylla ka dang bishar ïa ki mat jingdawa.
Ka FASToM dang shen ka la tyrwa ruh sha ka Sorkar ban pynkiew ïa ka jingsiew sha ki Headmaster, Headmistress, Principal jong ki skul kiba hap ban trei tam ïa ka por.
Dang ha kine ki khyndiat sngi, u Myntri Rangbah ka Jylla u Conrad Kongkal Sangma u la pyntip ba ka Sorkar Jylla kam pat lah satia ban shim rai eiei halor ka jingdawa jong ki nonghikai skul Adhoc.
U la ong ba ka Sorkar ïa mynta ka dang bishar ïa ka jingtyrwa jong ki nonghikai skul Adhoc ban kyntiew ïa ka jingsiew tulop.
