Shillong, ïaïong, 27: Ka Sorkar Jylla haduh mynta ka dang bishar bniah ïa ka jingdawa jong ka Federation of All School Teachers of Meghalaya (FASToM) ban kyntiew kyrdan Deficit Pattern/Deficit System ïa ki nonghikai skul Adhoc kiba don hapoh phra hajar duna eiei ha baroh kawei ka jylla Meghalaya.
“Ngi sngewkhia ïa ka jingbym ïatreilang (jong ki nonghikai skul Adhoc) bad halor ka jingdawa jong ki nonghikai. Kane ka dei ka jingtynjuh kaba ap ïa ngi hakhmat namar ba kan ktah ïa ka jingpynlut pisa kaba jur bha bad namarkata kam long satia kaba suk ïa ngi ban shu pyntreikam noh mardor ïa ka jingdawa,” ong u Myntri Rangbah u Conrad K. Sangma ha ka jingïakren bad ki lad pathai khubor ha ka sngi Balang.
“Ngi hiran bha ha ka jingpynmih khajna, dei na kane ka daw ba ngi hap ban pynlong aiñ ïa ka kam khalai Online Gaming bad ngin peit haduh katno ngin lah ban pynmih khajna namarba ngi hap ban pyndap ïa ki jingdawa jong ki nonghikai bad kumno ruh ban pyndap pisa na ka bynta kiwei pat ki kam pynroi,” la ong u Myntri Rangbah.
“Ngi hap ban thew sawar bha. Ngi hap ban bishar bniah ïa kane ka mat. Ngi la ïakren sani halor kane ka mat jong ki nonghikai bad u Myntri ka tnat Pule Puthi. Ngin sa peit kan long kumno bad ïa mynta hi ngam lah ban ai jubab lut ïa baroh ki jingïakren bad nga lah ban ong ba ngi dang bishar sani bha ïa kane ka kam,” ong shuh shuh u Myntri Rangbah.
Haba ïathuh shaphang ka jingthmu ka Sorkar ban ïarap pisa ha ka Pule Puthi, u Conrad u la ong, “mynta ka sngi nga dang shong jingïalang bad ki ophisar ka tnat Pule Puthi ban ïakren hakaba ïadei bad ka jingmaramot ïa ki skul. Kumba 100 haduh 200 tylli ki skul kin sa ïoh building thymmai bad kumba 1800 tylli ki Lower Primary School yn sa maramot ha ka jinglut kaba T.2 lak haduh T.3 lak.”
“Ngi dang shu mynjur ïa ka jingtyrwa mynta ka sngi bad haduh T.170 klur yn sa mang pisa na ka bynta ban pynbha ïa ki ing skul bad ban pynkha ruh ïa ki kamra klas jong ki 2,000 tylli ki skul,” u la ong.
“Ha kane ka jingïalang ngi la ïathir sani ruh halor ka jingdawa jong ki nonghikai skul Adhoc, bad mynta ngi dang bishar,” u la bynrap.
Ha kawei pat ka liang, u Bah Kenneth Shadap ha ka sngi Balang u la phah ïa ka shithi iehnoh ïa ka kam kum u President ka Federation of All School Teachers of Meghalaya (FASToM).
“Da kane ka shithi nga phah ïa ka shithi iehkam jong nga kum u President ka FASToM khnang ban plie lad ïa kiwei pat ki nongïalam. Nga sngewnguh ïa ki nongïalam bad ïa ki nonghikai ha ki snem baladep kiba la ïatreilang ryngkat bad nga,” ong u Bah Shadap ha u kyrwoh.
