Shillong, Lber 30: Ka Khasi Hills Autonomous District Council (KHADC) kam pat don jingthmu na ka bynta ban buh ïa ka tnad treikam jong ka Council ha Mairang Eastern West Khasi Hills kaba dei ka distrik ba thymmai.
“Ym pat don jingthmu ïa mynta, hynrei na ka liang ka Executive Committee ba thymmai kan sa shong ban bishar,” ong u Executive Member ka tnad Council Buildings bad Council Assets Bah Pynkhrawboklin Kharjahrin haba jubab halor ka jingkylli ba wanrah da u MDC ka Mairang Bah Equator L Nongrang ha ka sngi sdang jong ka Dorbar Mangtyngka jong ka Ïing Dorbar jong ka Council kaba long ha kane ka sngi Balang jong ka taiew.
Hynrei haba jubab shuh shuh halor kane u EM u la ïathuh ba ka don ka jingïakren ha ki snem ba la dep ha kaba ka la don ka jingleit jurip na ka Council hynrei u la ong pat ba kam pat don kano kano ka jingïateh kular hapdeng ki trai jaka bad ka ophis.
Na ka liang u MDC ka Mairang u la kyntu ïa ka EC ba kan buh ïa ka tnat treikam hangtei na ka bynta ban pynsuk ïa ki paidbah ha ki kam kiba bun. “Ka la don ka jingwan peit ïa kane ka jaka bad kumta nga kyntu ban buddien bniah,” u la ong.
Halor kane, na ka liang u EM u la ong ba ka EC ba thymmai kan sa khmih bniah bad lada donkam ban leh kin sa leh. U ong ruh ba ka EC kan sa khmih bniah halor kane ka bynta.
Halor ka jingkylli bynrap da u Nongïalam ka Liang Pyrshah Bah Titos W Chyne, na ka liang u EM u la ong, “Ha ka miej ka jongnga ngam pat don jingtip hynrei da kaba pyndonkam ïa ka Rule kaba 60, nga shu ong ba na ka liang jongnga ngan sa pan ïa ka notis halor kane ka bynta bad yn sa ai ka jingshai.”
Na ka liang u Bah Titos u la kyntu ruh ïa ka EC ba kan shimkhia ïa kane ka bynta namar kadei ka jingkhmih lynti na ka distrik ba thymmai ban don ïa ka shnat treikam ha Mairang.
Mar ïadep kren u Bah Titos, na ka liang u CEM u la ïeng ban ai ïa ka jubab da ka ong, “Ka long kaba donkam ban don ïa ka tnad treikam ha ki headquarter bapher bapher bad kumta na ka liang ka Executive Committee ngin shimkhia ïa kane ka kam kaba ïadei bad ka tnad ophis ha Mairang.”
