Shillong, Nailur, 26: Lai phew tylli ki aplikeshon ba la aplai na ka bynta ban tih dewïong katkum ka juk stad saïan ba mynta ki dang ap ïa ka rai na ka Ministry of Coal ka Sorkar Pdeng.
Ïa kane la pyntip da ka Sorkar Jylla hakhmat ka Full Bench jong ka Ingbishar Meghalaya High Court ha ka jingshong bishar ïa ka PIL halor ka jingtih dewïong beain kaba la long ha ka sngi Baar. Ka Bench ka la bthah ba dei ban bud ruh ïa ki kyndon ïada ïa ka mariang haba tih deiwong katkum ka juk stad saïan ha ka jylla.
“Ha ka kyrteng jong ka Jylla, la pyntip ba ki don kumba 30 tylli ki aplikeshon ba la ïoh pdiang na ka bynta ban tih dewïong katkum ka juk stad saïan ïa kiba dang pynkhreh ban ai jingbit, da ka jingmynjur jong ka Ministry of Coal. La kyrmen ba yn bud ïa ki lad jingïada ïa ki kyndon ain ïada mariang haba tih dewïong katkum ka juk stad saïan,” ong ka hukum ba la pynmih da ka Full Nench.
U Advocate–General u la aiti ruh ïa ka jingthoh ba ïa kane ka kam la shimti ban peit hi da u Justice Katakey bad ïa kino kino ki jingdkoh la shimkhia ban peit da ka jylla ha kaba kumno ki karkhana ferro -alloy, ki karkhana pynmih dewbilat bad ki karkhana saiñ dewïong ki ïoh ïa u dewïong.
Ka Bench ka la bthah ba ïa ka kaiphod kaba ïadei bad kane dei ban aiti da ka Jylla ha ka taiew ban sa wan.
Ha kajuh ka por, ka 17th Interim Report la shimti ban phah da u Justice BP Katakey (retired) ha ka 22 tarik Nailur, 2023.
Shuh shuh, ïa ka status report la phah mynta ka sngi da u Justice Katakey ha kaba ïadei bad ka hukum ba la pynmih ha ka 29 tarik, Nailar 2023.
