Dang ap ktien ka KHADC na ki Hima ban ujor sha ïingbishar pyrshah ia ka MoU

Shillong, Naitung 07: U Bah Jambor War uba dei u EM ba peit ïa ka tnad Elaka jong ka Khasi Hills Autonomous District Council (KHADC) ha ka Sngipalei u la ïathuh ba ka KHADC ka dang ap ïa ki san hima ba kin wan mih sha ka KHADC ha kaba ïadei bad ka jingthmu ban leit ujor sha ïingkashari ïa ka MoU kaba la ïasoi da ka sorkar Meghalaya bad ka Assam.
U Bah Jambor haba pynshai ïa ka mat ïatai kaba la wanrah da u Bah Gabriel Wahlang ba na ka liang u CEM jong ka konsil u la khot da ka jingïalang ïa ki khlieh nongsynshar jong ka Hima Mylliem, Hima Nongspung, Hima Jirang, Hima Nonglang and Hima Jyrngam Sirdarship ban ïakren bad ki halor ka jingmut ïasoi MoU ka sorkar ha ka 15 tarik Lber 2022.
“Kum ka konsil ngi pyrshah ïa ka MoU namar ka sorkar kam kynjoh ktien shuwa ïa ngi hashuwa ba kan soi ïa ka MoU namar ka konsil ka dei ka nongpeit ïa ka jaka puta” ong u Bah Jambor.
Shuh shuh u la ïathuh ba na ka liang ka KHADC ruh ka la ai jingthoh sha u Myntri Rangbah ba kan peit biang ïa ki kyndon ba la ïasoi ha ka MoU bad u kla ïathuh ba kat haduh mynta ka sorkar kam ai satia kino kino ki jubab, hynrei la shu ioh ha ki lad pathai khubor ba ka sorkar ka ong kam lah shuh ban pynbeit biang ïa ka MoU.
U Bah Jambor u la ïathuh ruh ba ka Border Committee ba la thung da ka EC ki la shong jingïalang biang bad kitei ki san Hima ha ka 18 bad 22 Ïaiong 2022. “Dei ha ka 22 Ïaiong ba ngi a rai ban thaw da ka Cordination Committee(CC) ha kaba ki khlieh Nongsynshar kin long lang ki dkhot nalor ki MDC ka liang synshar bad ka liang pyrshah bad la ai bor ïa ki Hima ba kin leit sha Ïingbishar na bynta kane ka MoU. Kino kino ki Hima kiba kynduh jingeh ki lah ban wan sha ka CC hynrei kat haduh mynta ym pat don satia kawei ruh kaba wan mih” ong u Bah Jambor
“Nga kwah ban ong da kaba shai ba ha ka kam don stia kano kano ka jingïapher jingmut hapdeng ka liang pyrshah bad ka liangsynshar bad la don ka jingkren kaba na ki dkhot ka EC kaba long pyrshah ïa ka rai ka CC ka dei tang ka jingbtuid u thylliej” pynshai u Bah Jambor
Haba kren halor kane ka mat une u MDC ka Nongstoin u la ther tyngeh ïa ka jingïaid lait jong ka sorkar ïa ka konsil, ki Hima, ki Raid, ki shnong bad ruh ïa ki paidbah ha kaba kam shym la don satia kano kano ka jingpan jingmut na ki bad ka jingai kopi hashuwa ba kin soi ïa kane ka MoU.
U Bah Gabriel u la buh jingkylli ruh ïa ka jingleh klet ka sorkar ban pynbeit ïa u pud u sam kaba don ha ki thain Langpih ka jaka ba la ju don ki jingshah thombor bad ka jingduh ei ki mynsiem briew katba ïa ki jaka ba ym ju jia ka sorkar ka leh kyrkieh ïa kine ki jaka.
Shuh shuh u Bah Gabriel u la kyntu ïa ki para MDC ban buh shadien ïa ka party da kaba buh ïa ka jaidbynriew ha khmat namar ka jaidbynriew ka im dei namar ka jingdon ki jaka kiba longtrai da ma ka.
Haba shim bynta lang ha kane ka mat ïatai u MDC ka Mawhati ubah Charles Marngar la takrain tyngeh ïa ka jingkylla ktien jong ka NPP ha kaba ïadei bad ka jingthmu ujor sha ïingbishar ïa ka jingsoi MoU.
“Ngi iohi ha ki lad pathai khubor ha kaba u Bah Banjop Pyngrope u MDC jong kaNPP u la ai ka jingïaroh bad ka jingkyrshan ïa kaei kaba ka sorkar ka leh da kaba kop ruh ïa kito kiba pyrshah ba kin mih sha madan bad nga kwah ban ïathuh hangne ba ki paidbah ka Ribhoi ki long kiba la kloi ban mih madan”ong u Bah Charles
Haba ïadei bad ka jingthmu ban leit ujor sha ïingbishar ïa ka MoU, u bah Charles u la kylli la ka dang don ne em ka jingthmu namar ki 11 ngut ki MDC ka NPP ki kyrshan ïa ka MoU.
U Bah Charles u la ong ruh ba kiba bun hi ki paidbah jong ka Pilangkata wat haduh mynta kim pat hun satia ïa ka jingaiei ïa kane ka pung dohkha sha ka Assam.
Shuh shuh u Bah Charles u la kynthoh ruh ïa ka jingong jong ka sorkar bad u MDC ka NPP, ba ki jaka kiba ka jylla Meghalaya namar ba ki jaka ha Meghalaya la longtrai da ki riewshimet katba ka Assam pat ki jaka ki dei ki jong ka sorkar.
U Bah Charles u la ong ruh ba ïa ki jaka ha Block I ki ophisar ka sorkar jylla Meghalaya kim ju don kanokano ka jingpynthud ïa ka jingpyntrei ïa ki skhim katba ka sorkar Assam kam ju ai lad ïa ki skhim na ka sorkar jylla Meghalaya ba kin pyntrei ïa ki skhim. ‘Nga kyntu ïa ki para MDC ba kin ym shu ïashah sorkar katba ka leh bad ban klet ïa ka jaidbynriew’ ong shuh shuh u Bah Charles.
Haba kren pat ban kyrshan ïa ka jingfsoi MoU u Bah Bajop Pyngrope MDC ka Rambrai u la ong ba dei tang kane ka sorkar kaba pyni da ki kam ban weng syndon ïa ki jingeh na ki kam khappud kaba la sahkut da ki 50 snem.
“Dei hadien ba la dep soi ïa ka MoU ba ka DC jong jong ka Kamrup ka la ai jingbit ruh ban shna ïa ka surok PMGSY” ong u Bah Bajop
U Bah Bajop u la ai jingïaroh ruh ïa ka sorkar kaba la lah ban pynkohnguh ïa u CM ka Assam u Himanta uba la hap wan dalade sha Secretariat ban ïakren ïa kanbe kam bad u la takrain tyngeh ïa ka sorkar Congress kaba ym lah ban leh eiei ïa kane ka kam ha kine ki 50 snem.
“Mynnin, mynta bad lashai ngan kyrshan ïa kane ka MoU namar dei tang kane ka sorkar kaba lah ban leh haduh katne” ong u Bah Bajop.
“Ha Constetuency jong nga ngim duh kawei ruh ka jaka dei na kata ka daw ba nga kyrshan pura ïa ka MoU bad nga kyrppad ba i bah Charles in pule shuwa ïa ka MoU” bynrap shuh shuh u bah Bajop
Na ka liang pat u MDC shu sieh u la kyrpad ba kane ka mat ym dei ban sh sting khnang ba kan ym don ka jingduh ei ki jaka puta sha ka Assam.