Dang ap ka sorkar jylla ïa ka 50 klur na ka sorkar pdeng ban pynheh ïa ka Baljek Airport

Shillong, Rymphang 10 : U Myntri kam jngohkai u Timothy D Shira ula pynpaw ba ka Sorkar Jylla ka dang ap ba ka sorkar kan pyllait ïa ka song pisa ba 50 klur tyngka na ka bynta ban pynheh ïa ka Baljek Airport tangba u la kren artatien ba yn lah ban pynheh ïa kane ka kad liengsuiñ kat haduh ban da lah hiar ki liengsuin ba heh ne ki Airbus.
U Myntri u la ong “50 klur tyngka lah dep ban mang da ka sorkar pdeng hynrei ym pat pyllait ïa ka pisa sha ka Sorkar Jylla”
Shuh shuh haba iakren bad u Shira ula pynpaw ïa ka jingartatien halor ka jinglah ban pynheh ia kane ka Kad liengsuiñ ba kan lah ban ai jaka hiar ïa ki liengsuin kiba heh kum ki Airbus, haba pynpaw ïa ka jingeh ban ïoh jaka.
“Ka lah ban nym long ban pynheh ha ka ban lah ai jaka hiar ïa ka Airbus namar ka jingïoh jaka ka long kaba duna bha. Ki liengsuiñ kiba rit ba kit kumba 60 ngut ki briew ki lah ban hiar hangtei” ula bynrap.
Haba ïadei bad ka jingthmu ban kyntiew shuh shuh ïa ka Kad, u Shira ula ong ba ïa mynta ym pat don satia kano kano ka sienjam ban shna ïa ka kad liengsuiñ kaba heh.
“Nga tharai kan long kaba eh ban ïoh jaka hangtei ban tei ïa ka kad liengsuiñ kaba heh” ula pynpaw.
U Myntri ula pynpaw ïa kawei pat ka jingthmu ban shna ïa ki helipad ha man ki district kynthup ha Balpakram, ban kyntiew ïa ki kam jngohkai.