Shillong, Nohprah 12: U Myntri Rangbah ka jylla u Conrad K Sangma ha ka sngi Thohdieng ula leit jurip ïa ka Shillong Medical College kaba don ha Pastuer Institute barim ha Lawmali, Shillong bad pynpaw ïa ka jingkyrmen ba u Myntri Rangbah Duh ka Ri u Narendra Modi un wan ban plie noh shen ïa kane ka jaka pule doktor.
Ha kane ka sngi ïa u Myntri Rangbah la synran da u Myntri ka Koit ka Khiah u Bah Wailadmiki Shylla bad ki heh ophisar ka tnat ka Koit ka Khiah bad ki nongpynïaid ka College. U Myntri Rangbah ula ïoh ruh ban ïakren bad ki samla pule jong ka kynhun ne batch ba nyngkong kane ka medical college.
Na ka liang jong u, haba ai jingkren ha ka jingïalang, ula pynpaw ïa ka jingkmen bad ka jingsngewhun halor ka jinglah ban ïakynduh bad ïakren bad ki samla pule ba nyngkong eh ka college haba bynrap ba ka Shillong Medical College ka dei ka jaka pule ba kongsan bha ha ka jylla Meghalaya baroh kawei.
U la ong, “Nga don ka jingkyrmen ba ïa kane ka jaka pule un sa wan plie shen da u Myntri Rangbah Duh ka ri hynrei katba ngi dang ap ïa ka jingplie, ngam kwah ban ap ha ka ban ïakynduh ïa ki nonghikai bad ki samla pule.”
U Conrad ula pynpaw ruh ba ka Shillong Medical College ka dei ka project kaba eh bha ïa ka Jylla bad pynpaw ïa ka jingsngew nguh ïa ka Myntri barim ka Koit ka Khiah ka Kong Ampareen Lyngdoh bad ki ophisar ka tnat ka Koit ka Khiah kiba la shimkhia bad aiti lut ïalade ban pynwandur ïa kane ka college kumba ka long mynta.
U la ong, “Kin dang don shibun ki jingeh hakhmat jong ngi bad ki kam kiba donkam ban leh, hynrei ngi la ïengskhem ha ka jingkut jingmut jong ngi ban kyntiew ïa ka jylla.”
“Nga ai khublei ruh ïa ka jingshakri jong ki Doktor kiba la shah jied ban long shibynta jong kane ka medical college bad ruh ïa ka jingshemphang jong ki bad ka jingbtin lynti,” ula bynrap.
Shuh shuh haba kren sha ki samla pule ula ong ba ka dei ka khyllipmat ban sah jingkynmaw namar yn kynmaw ïa ki kum ki samla pule ba nyngkong eh ka Shillong Medical College da kaba bynrap, “Phi dei ruh ma phi ki ban long kiba kham kongsan, ban buh ïa ki kyndon na ka bynta ki samla pule hadien habud bad ka don ka jingkhmih lynti kaba khraw bha na phi baroh”.
U Myntri Rangbah ula kyntu ruh ïa ki samla pule ba kim dei ban duh mynsiem ha ka ban ïakynduh ïa ki jingeh bad ong, “Haba wan kiei kiei kiba thymmai, kin don beit ki jingeh hynrei nga kular ha phi ba ngi don hangne ban kyrshan ïa phi,” ula pynpaw.
Hadien kane, u Myntri Rangbah ula lum ïa ka jingïalang ban ïasyllok bad ki samla pule bad ki nonghikai kiba la pyntip ïa kaei ka jingshem jong ki ha kaba ïadei bad kane ka jaka pule.
