Shillong, Jylliew 02 : U Myntri Khynnah jong ka sorkar pdeng ba dei khmih ïa ki Tnat Information & Broadcasting bad Fisheries, Animal Husbandry & Dairying, u Dr. L Murugan ha ka jingwan jong u sha Meghalaya u la leit jngoh ïa ki jaka ri dohkha ha ka jylla bad ïakren bad ki nongri dohkha bad ki nongïoh jingmyntoi jong ki skhim bapher bapher jong ka sorkar hapoh ka Tnat Fisheries.
U Myntri u la leit jngoh ïa ka jaka ri dohkha ha shnong Um-eit ha Ri Bhoi District bad ïakren bad ki nongri dohkha bad ïamir jingmut halor ki kam rep bapher bapher ba ki trei. U la pynshlur ïa ki nongshong shnong jong ka thain ban sdang ïa ka kam ri dohkha bad ban plie ki lad ïoh kam ïoh jam na ka bynta ki nongshong shnong jong ka thain.
U Dr. Murugan u la pynlong ruh ka jingïamir jingmut bad ki shah hikai ha ka kam ri dohkha ha Meghalaya State Fisheries Research and Training Institute ha Mawpun Kshaid, Ri Bhoi District. U la leit jngoh ruh ïa ka pung Umïam ha kaba la pyllait ïa ki symbai dohkha ha wah Umïam.
Ha ka jingai jingkren shaphang ka Pradhan Mantri Matsya Sampada Yojana (PMMSY), u Dr. Murugan u la ong ba ka jingphaikhmat jong ka sorkar pdeng kalong halor ka jingkyntiew ïa ki jingdon jingem ha ka kam ri dohkha jong ka ri.
“U Myntri Rangbah duh, u Narendra Modi u la wanrah ïa ka Prime Minister’s Fisheries Infrastructure Fund ban ïarap ïa ki nongseng kam lajong,” u la ong da kaba ban ïa ki bynta bapher bapher ba don na ka bynta ka jingmyntoi jong ki briew kiba trei ha ki kam ri dohkha kum ka jaka buh pyndait-thah, ki jaka peit ïa ki mar bad kiwei kiwei. U la kyntu ïa ki nongri dohkha ba kin shim ïa ki lad ba ka sorkar ka ai.
Ha ka jingïakren bad ki nongri dohkha, u Myntri u la kren sani shaphang ka PMMSY, ka skhim ba kyrpang na ka bynta ban phaikhmat bad kyntiew ïa ka kam ri dohkha kaba ïaineh ha ka ri. Ïa ka skhim la sdang da ka jingbei tyngka kaba 20,000 klur ha kane ka kam na ka bynta 5 snem naduh u snem 2020-21 haduh 2024-25 ha baroh ki Jylla/ ki Union Territory. “Ngi phaikhmat halor ki jaka ri dohkha ki bym don ha ki jaka duriaw kum ka RAS, ki jaka ri dohkha ha ki wah. Dang shen, ngi la sdang ïa ka jaka ri dohkha ha Brahmaputra,” la bynrap u Myntri.
U Dr. Murugan u la ban halor ka jingkiew ka jingdawa shalan dohkha na India. “U Myntri Rangbah duh u la phaikhmat kyrpang sha ka Vocal for local,” u la ong da kaba bynrap ba ka PMMSY ka thmu ban kyntiew shuh shuh ka jingpynmih dohkha da 70 lak ton hapoh u snem 2024-25, ka ban kyntiew ka jingïoh nong na ka kam shalan dohkha sha ka T. 1,00,000 klur hapoh u 2024-25. Hapdeng ka jingeh namar ka COVID-19 ka ri ka la lah ban kot sha kumba T. 59,000 klur ka jingshalan dohkha ha une u snem.
La saindur ïa ka PMMSY ban weng ïa ki jingduna ha ka jingpynmih dohkha bad ka jingbha jong ki dohkha ba ïoh, ka teknoloji, ki kam hadien ba la tong dohkha, ka jingpynthymmai ïa ki kam katkum ka juk mynta, ka jingwanrah ïa ki rukom treikam kiba khlain bad kiba skhem bad ruh ka bha ka miat jong ki nongri dohkha.
Da kaba pyrshang ban lum lut ïa ki jingjop jong ka skhim Blue Revolution, ka PMMSY ka thmu ban wanrah ïa ki sienjam ba thymmai kum ka insurance na ka bynta ki lieng, ka jingkyrshan na ka bynta ka jingkyntiew jong ki lieng, ki bio-toilet, ki kam ri dohkha ha ki jaka ba don ki um duriaw, ki Sagar Mitra, ki FFPO/C, ki Nucleus Breeding Centre, ki startup kiba ïadei bad ki kam ri dohkha, ki incubator, ki Integrated Aqua park, ka jingkyntiew ïa ki shnong ha ki jaka rud duriaw kiba shaniah ha ki kam ri dohkha kum ka lad kamai ja kpoh, ki jingshakri Aquatic Laboratory Network bad ki kam ba ïadei bad kine, ka Traceability, ka Certification bad Accreditation, RAS, Biofloc & Cage Culture, ka jingdie lyngba ki lad digital, ki jingsaindur ïa ki rukom treikam ha ka jingri dohkha bad kiwei kiwei.
Ha ka jingïakren bad ki lad pathai khubor, u Dr. Murugan u la pynpaw ka jingkmen jong u ban wan jngoh ïa ka jylla Meghalaya bad u la kren shaphang ki skhim bapher bapher ba la pyntreikam hapoh ki Tnat jong ki. U Myntri u la ban biang ïa ka mantra jong u Myntri Rangbah duh, u Narendra Modi, kaba long ka “Seva ryngkat ka jingkylla” bad ong ba ka bha ka miat jong ki briew ba duk kadei ka thong jong ka sorkar kaba la dap phra snem.
U la pyntip ruh shaphang ki mobile veterinary unit ki ban sa plie ki ban bei tyngka na ka sorkar pdeng bad ïa ki fund yn sa ai sha ki Jylla hapoh ka tnat animal husbandry. “Ngi pynshlur ïa ki startup, ki nongseng kam lajong,” bad u la pynpaw ka jingsngewnguh jong u ïa u Myntri Rangbah duh, u Narendra Modi uba la wanrah ïa ki skhim ba kongsan na ka bynta ka roi ka par ha kylleng ka ri.
U Myntri u don ha ka jingwan jngoh kaba ar sngi ïa ka jylla Meghalaya kaba la sdang mynta ka sngi. Ha kane ka jingwan jong u, u Myntri un leit jngoh ïa ki jaka bapher bapher ba pyntrei ïa ka projek ban peit bniah ïa ki jingdon jingem ha kaba ïadei bad ki kam ri dohkha, bad ka jingpyntreikam ïa ka Pradhan Mantri Matsya Sampada Yojana (PMMSY) kumjuh ruh ki skhim jong ka Animal Husbandry ha ka jylla. U Myntri un ïakren ruh bad ki nongïoh jingmyntoi ha Shillong.
U Dr. Murugan u leit jngoh ruh ïa ka All India Radio, Cherrapunjee. U ïakren bad ki ophisar jong ki tnat hapoh ka Tnat I & B bad Animal Husbandry & Fisheries.
