Nongstoiñ, Naitung, 15: Ka long kaba thamula haduh katta katta ban tip ba ki don haduh hynriew phew hynriew ngut ki nonghikai skul sorkar hapoh ka jylla, kiba la shah weng kam ha kine ki snem ba la dep, kiba ka sorkar kam shym la thung shuh ïa ki bad ki la shu shong ïing noh. Don napdeng jong ki, kiba la hap ban leit bylla thang rnga, don kiba hap leit kit daju, don kiba la hap bad trei lyngkha noh bad bun kiwei kiwei ki kam bylla sngi katba ki ioh ei.
Hynrei kaba sngewsih ka long ba wat hadien ba ki la shu shong ha ïing bad kylla nong bylla sngi ruh, ka sorkar kam shym la aili ïa ki ba kin im suk da kaba shu trei bylla bor met. Hynrei ka la pynsajia shuh shuh da kaba daiñ kuna, halor ka nongrim ba kitei ki nonghikai ki dei ki nongïaleh pyrshah ïa ka sorkar, namar hadien ba ki la shah weng kam ki la ujor da ka mokutduma sha Ïingbishar.
Ha kaba ïadei bad katei ka jingshah daiñ kuna, uwei na ki nonghikai u bym kwah ban pynpaw kyrteng ïalade haba pyntip ha u nongthoh khubor, u la ong ba katba u dang thiah pang ha ïing u la ïoh pdiang ïa ka shithi na ka sorkar bad haba u la plied bad pule, u la lap ba la dei pynban ka jingpyntip ba na ka daw jong ka jingujor mokotduma jong ki ha ki snem ba la dep, ka sorkar ka hap ban daiñ kuna hynriew phew hajar tyngka ia uwei pa uwei u nonghikai u ba don ha ka thup jong kitei ki hynriew phew hynriew ngut.
Nalor kata u la ïa katei ka hukum daiñ kuna la phah kopi sha baroh ki heh jong ka sorkar jylla, ki District Head ba kynthup ïa ki Deputy Commissioner bad ki Superintendent of Police ba kin leh ïa kaba donkam.
Utei u babu u la ong ruh ba halor ïa katei ka hukum daiñ kuna jong ka sorkar, u hap ban kohnguh beit hynrei shuwa ba un leit siew ïa katei ka kuna, u hap ban die shuwa ïa ki pynthor kba, ka kper bad kawei ka khlaw kaba rit ba ki briew kin thang rnga namar ba kam don dieng heh kiba la long ban supply.
Nalor kata u la ong ruh ba lada um leit siew ruh u sheptieng, namar ba ha kawei ka sngi ki pulit kin wan kem beit ïa u bad ban ïa kaba shah set phatok bad pynjynjar ïa ka lok bad ki khun, ka bha ba un die duh noh kat ïa kiba u don, wat ïa ka ïing ruh lada jia ba ka pisa kam dap, u hap ban die na ka bynta ban leit siew ïa ka kuna sha ka sorkar.
U la bynrap ruh ba kaba kum kane ka jingjia kam pat ju jia mynno mynno ruh bad ka lah ban long ruh kum ka khlam ba shyrkhei tam, na ka bynta ki hynriewphew hynriew ngut ki nonghikai kiba ngat ha katei ka apot. Tangba na ka bynta kiwei ki para nonghikai kiba shah daiñ kuna, um tip la ki hap ban die lilam ïa ki jingdon jingem kum ma u.
U la ong ba ynda u la ïoh pynlang ïa katei ka pisa, um banse ban leit ïakynduh ïa u Myntri Rangbah ka jylla ban leit ai khublei kyrpang, namar ka jingai jingsneng jong u bad ka sorkar da kaba daiñ kuna kan pynshep tieng lut ïa baroh ki nongtrei sorkar, ba kin ym nud shuh ban ïakhih ne ïaleh pyrshah ïa ka sorkar wat lada ka leh kumno kumno ruh.
