Shillong, Nohprah 21: Ka Meghalaya State Pollution Control Board (MSPCB) ka la daiñ kuna T. 1.20 lak pyrshah ïa ka M/s Star Cement Limited, Lumshnong ha East Jaiñtia Hills district ba ka la pynkheiñ ïa ka Water and Air (Prevention and Control of Pollution) Acts jong u snem 1974 bad kumjuh jong u snem 1981.
Ka Board ka la ai por 7 sngi ba katei ka karkhana kan jubab ïa kane ka show cause notice ba balei ym shym la shim kam pyrshah ïa ka jingpynkheiñ ïa ka Consent to Operate.
“Mynta, halor katei kaba la kdew haneng ka Meghalaya State Pollution Control Board katkum ka bor ba la pynkup ha ka, hapoh ka kyndon 33A jong ka Water (Prevention and Control of Pollution) Act, 1974 bad ka Section 31A jong ka Air (Prevention and Control of Pollution) Act, 1981 kan daiñ kuna halor ka bai lutksan haba ïadei bad ka sawdong sawkun ka pisa kaba T. 1,20,000/- (Rupees One Lakhs Twenty Thousand only) ïa ka M/s Star Cement Limited kaba la lum jingkheiñ ruh halor ka nongrim jong ka rukom pynïaid ba la buh da ka Central Pollution Control Board for Assessing Environmental Compensation bad kaba la shim da ka Meghalaya State Pollution Control Board,” ong member secretary ka MSPCB Dr GH Chyrmang ha ka shithi ba la phah sha ka Star Cement ha ka 19 tarik mynta u bnai.
“Ïa kane ka bai lutksan halor ka jingpynjulor ïa ka sawdong sawkun dei ban siew hapoh ka 15 sngi naduh ka tarik ba la ïohpdiang ïa kane ka jingbthah ha ka rukom jong ka Demand Draft ne ka Banker’s Cheque kaba dei ban sei ha ka kyrteng jong Member Secretary Meghalaya State Pollution Control Board, Shillong. Lada ka unit kam leh ïa kane ka jingbthah kumba la kdew haneng, na ka liang ka Meghalaya State Pollution Control Board kan sa sdang ïa ki kam pyrshah ïa ka unit jong phi kumba shah ka kam bad kaba long ruh katkum ki kyndon bad ki aiñ (Acts and Rules),” ka la ong.
Kane ka jingshim kam pyrshah ïa ka cement plant ka long halor ka nongrim ba la ïohpdiang ïa ka jingujor halor ka jingpynkheiñ jong ka ïa ki kyndon ne Terms and Conditions jong ka Consent to Operate bad kaba pynbud pat da ki jingpynthymmai beit haba ïadei bad ka jingpyntuid ïa ki jaboh napoh ka unit jong ka naduh ka 16 tarik une u bnai Nohprah.
Ha ka jingkhmih la shem ba ka Online Continuous Emission Monitoring Systems (0CEMS) ka la long kaba offline.
Ka board ka la ong ba ka M/s Star Cement Limited da ka jingthmu lypa ka la pynkheiñ ïa ka Section 21 jong ka Air (Prevention & Control of Pollution) Act, 1981 bad ka Section 25 & 26 jong ka Water (Prevention and Control of Pollution) Act, 1974 bad ïa ki kyndon ne Terms and Conditions jong ka Consent to Operate na ka Board.
Ka board ka la phai ruh sha ka hukum jong ka National Green Tribunal, Principal Bench kaba la bthah ïa ka Central Pollution Control Board (CPCB) da kaba ong, “Ka CPCB ka lah ban shim ki jingpynshitom halor ka jingpulom, lada don, pyrshah ïa kito kiba donkti ban buh bad kiba pynneh ïa ki STP, CETP bad ETP. Ka CPCB ka lah ruh ban shim jingkheiñ bad ban ïoh ïa ka bai lutksan halor ka jingpynjulor ïa ka sawdong sawkun bad ïa kane ka pisa dei ban buh ha ka jaka kynshew pisa kaba long la ka jong bad ban pyndonkam na ka bynta ki kam bad ki jingpyrkhat ban ïada ïa ka sawdong sawkun. Kum kine ki jingpyrkhat ka CPCB ka dei ban pynkhreh hapoh ki 3 bnai”.
Ka NGT ha ka hukum jong ka 10 tarik u Naitung, 2019 ka la ong: “Ka CPCB ka dei ban kyntiew kyrdan ïa ki industrial unit katkum ka kyrdan jingpynjaboh jong ki. Ki SPCB bad CPCB ki long laitluid ban shim kino kino ki jingpynshitom ne ki sienjam ban pynshitom, kaba kynthup ïa ka jingïoh biang ïa ka bailutksan halor ki jingpynjulor ïa ka sawdong sawkun lyngba ka ‘Polluter Pays’ principle bad kumjuh ruh ban shim ïa ki sienjam ban ïada kum ka Precautionary’ principle.”
Ha kajuh ka por ka MSPCB ka la phah ruh ïa ka show cause notice sha ka cement company ba ka la pynkheiñ ïa ki terms and conditions jong ka Consent to Operate.
“La pyntip ruh sha kane ka ophis ha ka 19 tarik u Nohprah 2024 ba ka M/s Star Cement Limited ka la pynkheiñ ïa ki Terms and Conditions jong ka Consent to Operate bad kaba la pynbud pat da ka jingpynthymmai da kaba pyntuid jaboh napoh ki unit jong ka naduh ka 16 tarik u Nohprah,” ka la ong da kaba bynrap, “Katba ka M/s Star Cement Limited ka la dep don da ka jingthmu lypa ban pynkheiñ ïa ka kyndon 21 jong ka Air (Prevention & Control of Pollution) Act, 1981 bad ka Section 25 & 26 jong ka Water (Prevention and Control of Pollution) Act, 1974 bad kumjuh ruh ïa ki kyndon jong ka Consent to Operate na ka Board”.
“Namar kata la ai por 7 sngi ïa ka M/s Star Cement Limited, naduh ka sngi ba la ïohpdiang ïa ka shithi bad ka jingpynbna ka show cause notice kaba long ruh katkum ki bor jong ka Board kaba hapoh ka Sec. 33 (A) jong ka Water (Prevention and Control of Pollution) Act 1974 bad ka Section 3I (A) jong ka Air (Prevention and Control of Pollution) Act 1981 ba ym dei ban pyntreikam pyrshah ïa ka unit, bad lada kam sngap ïa kane, dei ban shim kam pyrshah ïa ka,” la maham ka MSPCB.
