Nongstoiñ, Ïaïong, 10: Ha kine ki saw snem tam naduh ba u bah Witting Mawsor um shym la shah jied shuh kum u nongmihkhmat, ki nongïalam bad ki nongkyrshan ka Hill State People Democratic Party jong ka Mawshynrut Constituency, ki la don hapdeng ka jingdukha mynsiem bad ka jingduh jingkyrmen khamtam ha kine ki saw tylli ki bnai, namar u bah Witting Mawsor u la pynpaw u don hapdeng ka jingartatien la un ïaleh biang ne un ym ïaleh shuh.
Hynrei, ka jingstad jong u nongïalam ba ha khlieh jong ka Party ka la pynhun jrut ïa ki paitbah nongkyrshan mynta, ha kaba u la lah ban wallam ïa u kyrtong u ba la bit la biang naduh ka kyrdan pule, ka jinglong bad u ba don shisha ka jingkitkhlieh ïa ka jingeh jong ki paitbah hapoh ka Constituency, ka District bad ka jylla hi baroh kawei.
Utei u kyrtong ba u nongïalam ka HSPDP Mawshynrut Constituency u dei u bah Methodius Dkhar na ka shnong Mawsaw, u ba la ïakhun teng ruh ïa ka election na katei ka Copnstituency ha u snem 2013 na ka party Congress pyrshah pyrshah ïa u bah Witting Mawsor na ka HSPDP bad u la wan tang ha ka kyrdan ba ar. Hynrei, ha kane ka kynti pat u la wan ban pynïasoh noh sha ka HSPDP bad un ïakhun ïa ka election ha u 2023 na kane ka party.
Ïa ka jingïalang ban pynbna paitbah ïa u bah Methodius kum u kyrtong ka HSPDP, la pynlong ha ka madan jong ka skul Rongrin Secondary School Umdang ha ka sngi saitjaiñ, ha kaba la donlang da u bah K.P.Pangñiang President rangbah ka party, u bah Witting Mawsor President ka HSPDP West Khasi Hills, I kong Badariti Lyngdoh Nonglait President ka HSPDP Women’s Wing central body, u bah Methodius u ba dei u kyrtong, ki nongkitkam ka party napoh ka Constituency ba kynthup ïa ki nongïalam kiba la wan rung na kiwei pat ki party.
Ha katei ka jingïalang, ka HSPDP ka la pdiang burom ruh ïa kiba la wan na kiwei pat ki party kum na ka NPP, Congress bad PDF, kiba la wan ban pynïasoh thymmai bad kiba la shimti ruh kum ki nongkitkam ba thymmai ban ïatreilang bad ai ka jingkyrshan ba pura ïa ka HSPDP. La ïoh ruh ïa ka jingkren na ki rangbah kiba la wan ban pynïasoh ba kynthup ïa u bah Srolin Puweiñ, u ba dei u nongïalam ba hakhmat duh jong ka PDF, u bah Norbet nongïalam ba hakhmat jong ka NPP, ki nongïalam jong ka Congress bad kiwei kiwei.
Ha kajuh ka por la ïoh ïa ka jingkren na u bah Witting Mawsor President ka HSPDP West Khasi Hills District, na u bah K.P.Pangñiang President rangbah ka party. U bah Pangñiang haba ai jingkren ha katei ka sngi, u la ong ba ka jingpynbna ïa u kyrtong ha katei ka jaka ka long kum ka dak ban pynsah jingkynmaw, namar ka shnong Umdang ka dei ka shnong trai jong u bah Raisen Mawsor u MLA ba nyngkong duh jong ka Mawshynrut Constituency u ba la jop na ka HSPDP.
Nalorkata u la ong ruh ba ka jingïoh ïa u bah Methodius Dkhar kum u kyrtong jong ka party na katei ka Constituency, ka long ka jingkyrkhu kaba khraw ïa ki paitbah nongshong shnong, namar utei u kyrtong u dei u ba la biang ka jingnang jingstad bad u ba dei ruh na ka longiïng kaba dei na kajuh ka Constituency bad ka jingpoi jong u sha ki kyrdan pule kiba heh ka dei da ka jingtrei shitom namar ki kmie ki kpa ki long ki ba duk.
Nalor kata u la ong ruh ba u briew u ba dei na ki nongkyndong u sngewthuh ïa ka jingeh jong ki paitbah, namar ïalade ruh u la mad ïa kijuh ki jingeh. U bah Pangñiang u la kyntu ïa baroh ki nongkitkam bad ki nongkyrshan jong ka party, ba kin trei da ka jingsngewrit bad ka jingieit bad ki dei ban don ka jingïasngewthuh jingmut para nongïalam, khnang ba ki lah ban wanrah ïa u soh jong ka jingjop.
