Shillong, Nailur 11 : Ka All India Trinamool Congress ka la pynap lypa da u samla Batskhem Marbañiang kum u kyrtong jong ka na Mawsynram ha jaka u Bah HM Shangpliang hadien ba la mih ki khubor ba utei u MLA un ïakhun noh na ka BJP ha ka elekshon ha u 2023.
Ïa utei u rangbah ka Trinamool ka la pdiang burom ha ka sngi Nyngkong ba la dep ha ryngkat ki nongkyrshan ba radbah na kylleng ki shnong jong ka Mawsynram constituency.
Ha kane ka sngi, u Vice President ka party Bah James Lyngdoh ryngkat u Bah Shongdor Diengdoh ki la pynskhem ruh ïa u Bah Batskhem kum u Convener.
Na ka liang ki nongïalam ka party haba kren bad ki lad pathai khubor, ki la ïathuh ba ka jingwan jong u Bah Batskhem kan ïarap shuh shuh ïa ka party ba kan lah ban leh bha ha ka elekshon ban wan.
U Bah Batskhem ha ka jingkren u la ong ba ka jingjied jong ki ban pynïasoh sha katei ka party kadei namar ki kwah ban jop. “Kawei ka dei namar ka party Trinamool mynta ka ïakhun ban knieh noh ban synshar na kane ka party kaba synshar mynta ïa ka jylla,”u la ong da kaba ïathuh ba ki don ruh kiwei ki party kiba la khot ïa u tangba u kwah ban trei lang bad ka AITC.
Watla ki nongïalam ka party kim pat treh ban ong eiei hynrei la sngewthuh ba u Bah Batskhem un dei u kyrtong ban ïakhun na katei ka party ha u 2023.
Lah ban kdew hangne ba dang shen ki nongïalam ba ha khmat eh jong u Bah HM Shangpliang na ka AITC dang shen ki la leit ban pynïasoh noh sha ka BJP kaba la pyntikna shuh shuh ba utei u MLA un poi lang sha katei ka party shwa ka elekshon.
