Shillong, Naiwieng 13 : Ka Mylliem Block Congress Committee (MBCC) ka la rai ban pynieng da u samla Banphiralang Basaïawmoit kum u kyrtong ha kane ka elekshon MDC kaban sa long shen ha Khasi Hills Autonomous District Council (KHADC).
Ïa kane ka rai, ka Congress ka la shim ha ka jingïalang kaba long ha ka sngi Nyngkong ha ryngkat ka jingdonlang ki nongïalam na ki unit bapher bapher jong ka constituency kynthup lang ruh ïa u MLA bad MDC ka Mylliem, Bah Ronnie V Lyngdoh.
Katkum ka khubor na ka party, la ïathuh ba dei da ka jingmynjur lang jong baroh ki unit ba ki la pynskhem ïa u Banphira ban long kum u kyrtong jong ka Congress.
U Bah Ronnie haba kren ha kane ka jingïalang u la ong, “Ka long kaba sngewtynnad ban ïohi ïa ka sur kaba long kawei ban jied ïa u kyrtong na bynta kane ka elekshon MDC.”
Shuh shuh u la ïathuh ba ki la don bun kiwei ki longkmie bad ki rangbah na kiwei ki seng kiba kwah ban ïakhun na ka Congress. “Don kiba la pynpaw bad don pat kiba phah briew ban pynpaw ba ki kwah ban ïakhun na ka Congress. Hynrei sngewtynnad pat ïa ka sur kaba mih na phi ki nongïalam bad ki nongkyrshan ba dei ban ïoh kyrtong na ka party lajong,” u la bynrap biang.
Katba u samla Banphira ha ka jingkren u la ong ba naduh ba u don bad ka party kum u nongïalam jong ka Youth Congress u la trei borbah na ka bynta ban pynkhlaiñ ïa ka party bad khamtam eh bad ki samla Congress.
“Ngi la donlang ryngkat ryngkat naduh ka elekshon 2019, naduh ka elekshon MDC kumjuh ha ka elekshon MP kaba i Bah (Ronnie) i la jop bad kumjuh i Bah Pala ruh i la ïoh ïa ka jingjop. Ngi la trei borbah biang ruh ha ka elekshon MLA 2023 bad i Bah i la jop kum u MLA ka Mylliem tangba ngi rem noh ha ka elekshon MP kaba dang shu dep,”u la ong.
Une u samla u la ong ruh ba kum u samla uba la don bynta ha ka kam saiñpyrthei bad kumjuh ha ka imlang sahlang ki lah ban wanrah ïa ka jingkylla lada ki don ïa ka thong treikam kaba bha.
