Da u motdur tynrai u Khasi buh jingkynmaw ka SSMP ha ka jingrakhe dap 20 snem, plie u Myntri Rangbah

By Mawphor Editor On Jan 20, 2026

Shillong, K’Lyngkot 19: U Conrad K Sangma uba dei u myntri rangbah ka jylla, mynta ka sngi u la plie paidbah ïa ka mot dur tynrai jong ki Khasi (Mural) kum ka dak ïa ka jingrakhe dap 20 snem ka Seng Samla Mawlai Pyllun (SSMP).
Ïa kane ka motdur ha kynroh la pynïeng ha Rymbai Fuel Station, kaba don ha Mawlai Mawïong Rim.
Haba kren kum u kongsan, u Conrad K Sangma, u la ai khublei ïa ka Seng Samla, Mawlai Pyllun, halor ka jingkynjoh sha u mawmer ba 20 snem jong ka jingshakri bad noh synniang ha Mawlai bad bynrap ruh ba ki don katto katne ki nongrim treikam kiba ïalam lynti ïa ka jingtreikam jong ka Sorkar bad ka nongrim treikam ba kongsan eh ka long ban pynthikna ïa ka jingkhmih bad jingshimkhia ïa ki jingeh jong baroh ki briew ha ka imlang sahlang.
“Ki samla jong ka imlang sahlang ki dei ka bynta kaba kongsan tam bad ki seng samla tynrai bapher bapher kum ki Seng Samla ki long kiba kongsan ym tang na ka bynta ka lawei hynrei na ka bynta ka por mynta jong ka jylla jong ngi,” ong u Conrad.
U myntri rangbah u la kyntu ruh ïa ki samla ba kin shim kabu ïa ki prokram bad ki skhim jong ka sorkar jylla kiba la thmu kyrpang na ka bynta ki samla ka jylla na ka bynta ka jingkiew bad jingiatreilang jong ki katba ki ai ïa ki sap, ka rynsan bad ki lad ki lynti kiba donkam.
“Ka khubor kaba nga kwah ban ai mynta ka sngi ym tang sha ki samla ka Mawlai hynrei ïa ka jylla baroh kawei ka long ba ka pyrthei mynta ngi im ha juk jong ka jingïakhun bad katba ngi dang don ïa ki kyndon jong ka riti synshar jong ngi ban ïada ïa ka hok jong ngi to ngin ym long kiba sngewrit hynrei pynkhreh ïalade ban ïakhun bad kiba tbit tam ha ka pyrthei,” u la ong bad bynrap, “Nga kyrmen ba kane ka jingrakhe ïa ka jingdap 20 snem jong ka Seng Samla, Mawlai pyllun kan long kata ka jingkylla.”
Haba pynkut ïa ka jingkren jong u, u Myntri Rangbah ka Jylla, u la ong ba ka jingdro dur tynrai kaba pyni ïa ka kolshor jong ki Khasi kan long ruh kum ka jingkhring dur bad ka jingpdiang sngewbha ïa ki nongwan jngohkai pyrthei kiba wan rung sha Shillong.
Ha kane ka sngi la aiti ruh ha u Myntri Rangbah ka Jylla ïa ki Memorandum na ki Dorbar Shnong bad ki seng Seng Samla jong ka thaiñ, kiba la pynpaw ïa ki katto katne ki jingeh bad ki jingdonkam jong ka thaiñ Mawlai.