Da u mot dur ba shi rynïeng, plie paidbah ka KSU ha ka sngi ïap ba 85 u Myllung Soso Tham ha NEHU

Shillong, Nohprah 19: Kum shi bynta ban rakhe ia ka jingdap 85 snem ka lyngkhuh sngi iap u Myllung Soso Tham, ka Khasi Student Union (KSU) kala plie paidbah ia u mot dur ba shi rynieng ha NEHU Campus ha khmat ka Central Library.
U Chairman ka North Eastern Student Organisation (NESO) u Bah Samuel Jyrwa u la ong, kum ki paidbah ngim da sngewthuh ne pylleit jingmut eh ia ki poetry kiba u Myllung Soso Tham ula thoh, hynrei dei tang ynda ngi la sdang heh ka rta kita ki kyntien ba u Myllung Soso Tham ba u la thoh ki la sdang ban shong dur bad shong sbai ha ki jingmut jingpyrkhat jong ngi.
“Lada don ha kino kino ki jingiakhun bunsien ngi ju duh mynsiem, hynrei haba ngi pule ia ki kyntien ba u Myllung ula thoh, ki la ai mynsiem ba ngim dei riej, ngim dei ban kynran dein, hynrei ngi dei ban tur beit shakhmat ban ieng ban ialeh na ka bynta ka ri bad ka jaitbynriew” ong u Bah Samuel.
Shuh shuh u Bah Samuel u la ban ruh ba U Myllung Soso Tham u la kren ruh ha ki poetry jong u ba ngin long kum “Ki Sympyllieng” ba ngin mih ha kino kino ki por ba don ka jingeh bad ba ngin ai ka jingshai na ka bynta ka ri bad ka jaitbynriew.
U Bah Samuel u la ong, ki jingthoh u Myllung ki la dei kiba naduh mynshwa hynrei wat haduh mynta ka snem 2025 ki dang iai don jingmut bad kit jingmut haduh ki sngi kiba mynta, namar ba u Myllung Soso Tham ulong u briew uba iohi jngai ia kiei baroh.
Na ka liang u President ka KSU u samla Lambokstar Marngar u la ong ba kano kano ka jaitbynriew kaba klet ia la ki jong ki riewkhraw kan sa dei ka jaitbynriew ka ban sa jah noh na kata ka snieh jong ka pyrthei.
“Ha man ki jingialeh ki jingiakhun kiba kum ka seng ki ju kren ki issue bapher-bapher, ka jingioh mynsiem ka long lyngba ki kyntien jong u Myllung ka ba pynlong ia ngi ba ngin iaid shakhmat ha ki jingtyngjuh bapher bapher ong u samla Lambok.
Shuh shuh u samla Lambok u la ong, Ki jingma ki ap ia ka ri bad ka jaitbynriew baroh kawei bad u Myllung ula dep maham lypa “ba ngin sa long ki nong tong um, ki nong thoh dieng jongno re jongno”. U Samla Lambokstar u la ong ba kita ki jingkren u Myllung ki long ki kyntien ban kyrsiew ia ki khun samla bad ia baroh ka bri u hynniewtrep ba kim dei ban shim stieng ia ka jinglong jingman.
Ha katei ka sngi la ïadon bynta da u Samla Biangbor L Paliar, Vice president KSU Sengkmie kumjuh ruh President KSU Mawlai Circle, u Dr Marbhador khymdeit jong ka khasi department NEHU Unit, U Bah FR sumer Librarian, Ilerning Bareh university engineer, Dr Desmond kharmawphlang u president ka MeTTA bad ki nong shah khot sngewbha.