Shillong, Naiwieng 20 : Ka National Peoples Party ha ka jylla ka la thung da u MLA ka Jowai, Bah Wailadmiki Shylla kum u President ba thymmai jong ki samla NPP hadien ba ka samoi treikam jong u Bah Kitborlang Nongrem ka la kut noh.
Haba kren hadien ka jingïalang shimti kam, u Bah Wailadmiki u la ong ba kum u nongïalam ba thymmai u shim ba kane ka kam kum kawei pat ka jingkitkhlieh ban trei na bynta ka bit ka biang jong ka jylla.
“Ka kam ka la don lypa bad ka kamram jong nga ka long tang ban shu buddien beit,” ong u Bah Wailad haba kren bad ki lad pathai khubor. Ha kajuh ka por u la pynpaw ruh ïa ka jingkmen halor ka jingjied jong ka party ïa u ban shimti ïa katei ka lyngkor ban trei na bynta ka party.
Ha kajuh ka por u President barim, Bah K Nongrem pat u la ong ba u la hun namar ha ki lai snem ba u bat kum u President ka NPYF u la ïoh ban trei lang ryngkat ryngkat bad ka kynhun shibun ki kam kiba ïadei bad ka imlang sahlang khamtam eh haba ïadei bad ki ishu kiba ktah ïa ka Jaidbynriew bad ïa ka jylla.
“Nga hun ka mynsiem bad nga kmen ruh ban ïohi ba ïa kane ka lyngkor la shimti da u wei pat u rangbah uba kham samla bad ba don jingtbit ha ka kam,” u la ong.
La donlang ruh ha kane ka sngi naduh u General Secretary Organisation, James K Sangma, Working President ka party Bah Hamlet Dohling, National President NPYF Bah Nicky Nongkhlaw, kiwei ki nongïalam ka party Bah HM Shangpliang, ki nongïalam jong ka Womens Wing bad ki nongïalam jong ki samla NPP na kylleng ki bynta jong ka jylla.
